ಬೆಂಗಳೂರಿನಲ್ಲಿ ಪುಟ್ಟಿ !!!

ಪುಟ್ಟಿ ಮತ್ತು ನಾನು ಈಗ ನಮ್ಮೂರು ಬೆಂಗಳೂರಿನಲ್ಲಿ ಅಮ್ಮ ಅಪ್ಪ ನ ಜೊತೆಯಿದ್ದೀವಿ. ನಮ್ಮ  ವಿಮಾನ ಪ್ರಯಾಣ ಪುತ್ತಿಗೆ ಬಲು ಇಷ್ಟವಾಯ್ತು. ಸಹ ಪ್ರಯಾಣಿಕರ ಜೊತೆ ಹರಟುತ್ತಾ ಕಾಲ ಕಳೆದಳು ಪುಟ್ಟಿ. 

ಇಲ್ಲಿಗೆ ಬಂದಾಗಿನಿಂದಲೂ ಮನೆಯ ಯಾವ ಕೆಲಸ ಇಲ್ಲದಿದ್ದರೂ ಕಂಪ್ಯೂಟರ್ ಮುಂದೆ ಕೂರಲು ಪುರುಸೊತ್ತೇ ಇಲ್ಲ. ಪುಟ್ಟಿಗಂತೂ ಬೀದಿ ತುಂಬಾ ಹೊಸ ಸ್ನೇಹಿತರು.  ಅವರ ಜೊತೆ ಆಟವಾಡುತ್ತಾ ಅವಳಿಗೆ ಮಜವಾಗಿದೆ.  

Read More

ಮಲ್ಟಿ ಕಲ್ಚರ್ ಡೇ!!

ಪುಟ್ಟಿ ಶಾಲೆಯಲ್ಲಿ ನಿನ್ನೆ ಭಾನುವಾರ ’ಮಲ್ಟಿ ಕಲ್ಚರ್ ಡೇ’ ಆಚರಿಸಿದರು. ಎಲ್ಲರೂ ಅವರವರ ದೇಶದ ಉಡುಗೆ ತೊಟ್ಟು ಹೋಗಬೇಕಿತ್ತು. ಪುಟ್ಟಿ ಎಂದಿನಂತೆ ಉತ್ಸಾಹದಿಂದ ಸಿಂಗರಿಸಿಕೊಂಡು ಹೊರಟಳು. ಅಲ್ಲಿ ಎಲ್ಲಾ ಮಕ್ಕಳಿಂದ ಒಂದು ಸಣ್ಣ ಕಾರ್ಯಕ್ರಮವೂ ಇತ್ತು. ಅದರ ವಿಡಿಯೋ ತುಣುಕು.....

ನಮ್ಮ ತ್ರಿರಂಗ..

ನೆಚ್ಚಿನ ಐರೀನ್ ಜೊತೆಯಲ್ಲಿ...

ಇದಾದ ನಂತರ ಎಲ್ಲರ ಜೊತೆಗೂಡಿ ಊಟ ಮಾಡುವ ಕಾರ್ಯಕ್ರಮ. ಎಲ್ಲರೂ ಅವರವರ ದೇಶದ ಒಂದು ಅಡಿಗೆಯನ್ನು ತಂದಿದ್ದರು. ಇದೊಂದು ತರಹ ವಿಶೇಷ ಅನುಭವ!!

ನಮ್ಮ ಶ್ಯಾವಿಗೆ ಪಾಯಸ...

Read More

ನಮ್ಮ ದೇಶ ಭಾರತ !!

ಭಾರತದ ಸ್ವಾತಂತ್ರ ದಿನೋತ್ಸವದ ಅಂಗವಾಗಿ ಪುಟ್ಟಿ ಕೈಯಲ್ಲಿ ಇವನ್ನು ಪೈಂಟ್ ಮಾಡಿಸಿದೆ.

ಕೇಸರಿ (ಇಲ್ಲಿ ಕಂದು ಬಣ್ಣವಾಗಿದೆ) ಮತ್ತು ಹಸಿರು ಬಣ್ಣದ ಪಟ್ಟಿಗಳನ್ನು ಅಗಲ ಬ್ರಷ್ ನಲ್ಲಿ ಪುಟ್ಟಿ ಬರೆದಳು. ನೀಲಿ ಬಣ್ಣದ ಚಕ್ರ Fiori pasta ದಿಂದ ಮಾಡಿದ್ದು. Ruote ಉಪಯೋಗಿಸಿದರೆ ಚಕ್ರದ ಆಕಾರ ಇನ್ನೂ ಚೆನ್ನಾಗಿ ಮೂಡುತ್ತದೆ, ಅದು ಮನೆಯಲ್ಲಿ ಇರಲಿಲ್ಲ:(

ಹುಲಿ

ಅಂಗೈಗೆ ಬಣ್ಣ ಹಚ್ಚಿ ತಲೆ ಮಾಡಿದೆವು. ಆಮೇಲೆ ಹೆಬ್ಬೆರಳು ಬಿಟ್ಟು ಉಳಿದೆಲ್ಲಾ ಕಡೆ ಬಣ್ಣ ಬಳಿದು ದೇಹ, ಒಂದು ಬೆರಳಿನಿಂದ ಬಾಲ ಮತ್ತು ಕಾಲುಗಳು, ಬೆರಳ ತುದಿಯಿಂದ ಕಿವಿಗಳು. ಇದು ಒಣಗಿದ ಮೇಲೆ ಕಪ್ಪು ಬಣ್ಣದ ಗೆರೆ ಮತ್ತು ಚುಕ್ಕಿಗಳು!

ನವಿಲು

ಕಮಲ

ಕೈ ಗುರುತು ಪುಟ್ಟಿಯದು. ಕಪ್ಪು ಪೆನ್ನಿನಲ್ಲಿ ಬರೆದದ್ದು ನಾನು. ಈ ನವಿಲು ಮತ್ತು ಕಮಲವನ್ನು ಇಲ್ಲಿ ನೋಡಿದ್ದೆ!

ಮಾವಿನ ಹಣ್ಣು!

ಮೊದಲು ಒಂದು ಪೇಪರ್ ಪೂರ್ತಿ ಬಣ್ಣ ಬಳಿದು ಅದನ್ನು ಒಣಗಲು ಬಿಟ್ಟೆವು. ನಂತರ ಅದನ್ನು ಚಿಕ್ಕ ಚಿಕ್ಕ ಚೂರುಗಳಾಗಿ ಕತ್ತರಿಸಿ, (ಪುಟ್ಟಿ ಈಗಷ್ತೆ ಕತ್ತರಿಸಲು ಕಲಿಯುತ್ತಿದ್ದಾಳೆ) ಒಂದು ಹೊಸ ಹಾಳೆಯ ಮೇಲೆ ಮಾವಿನ ಚಿತ್ರವನ್ನು ಬರೆದು ಅದರ ಒಳಗೆ ಚೂರುಗಳನ್ನು ಅಂಟಿಸುವುದು. ಕೊನೆಯಲ್ಲಿ ಬರೆದ ಚಿತ್ರವನ್ನು ಅಳಿಸಿಬಿಟ್ಟೆವು :)

Read More

ಸಂಕ್ರಾಂತಿಯ ಸಂತಸ!!!

ಎಲ್ಲರಿಗೂ ಮಕರ ಸಂಕ್ರಾಂತಿ ಹಬ್ಬದ ಶುಭಾಶಯಗಳು !! ಕಳೆದ ವರ್ಷ ಬೆಂಗಳೂರಿನಲ್ಲಿ ಅಜ್ಜಿಯ ಮನೆಯಲ್ಲಿ ಎಲ್ಲರ ಜೊತೆಗೂಡಿ ಹಬ್ಬ ಮಾಡಿದ್ಲು ಪುಟ್ಟಿ. ಅವಳು ಮತ್ತು ಅವಳ ಸೋದರ ಮಾವನ ಮಗಳು 'ಖುಶಿ' ಗೆ ಸಂಜೆ ಎಳ್ಳು ಎರೆದು ಆರತಿ ಮಾಡಿದಾಗಿನ ಫೋಟೊಗಳಿವು:)

ಮಾವನ ಮಗಳೆ ಖುಶಿ ಬಾರೆ

ಎಳ್ಳು ಬೆಲ್ಲ ಬೀರೋಣ ಬಾ

ಜರತಾರಿ ಲಂಗ ಕುಪ್ಪಸ ತೊಟ್ಟು ಬಾ

ರೇಷಿಮೆ ಲಂಗ ತೊಟ್ಟು ನಾ ಬರುವೆ

ಅಜ್ಜಿ ಕೊಟ್ಟ ಎಳ್ಳು ಬೆಲ್ಲವ

ಎಲ್ಲರ ಮನೆಗಳಿಗೆ ಬೀರೋಣ ಬಾ!!
(ತವಿಶ್ರೀ ಅವರು ಬರೆದ ಚೆಂದದ ಪದ್ಯವನ್ನು ಸ್ವಲ್ಪ ಮಾರ್ಪಡಿಸಿರುವೆ )


ಮಾಲಾ ರಾವ್ ಅವರು ನಂದಗೋಕುಲದಲ್ಲಿ ಪುಟ್ಟ ಅಮ್ಮುವಿಗೆ ಬರೆದ ಎಳ್ಳು ಎರೆಯುವ ಹಾಡು.

Read More

ಎಲ್ಲಾ ಹಣ್ಣುಗಳು ಇಷ್ಟ !!!

ಪುಟ್ಟಿಗೆ ಘನ ಆಹಾರ ಕೊಡಲು ಶುರು ಮಾಡಿದಾಗಿನಿಂದಲೂ ಎಲ್ಲಾ ಹಣ್ಣು ಮತ್ತು ತರಕಾರಿಗಳು ಬಲು ಇಷ್ಟ. ಈಗಂತೂ ಅನ್ನ/ ಚಪಾತಿ/ರೊಟ್ಟಿ ಜೊತೆಗೆ ಪಲ್ಯ ಕೊಟ್ಟರೆ, ಪಲ್ಯ ಮಾತ್ರ ಖಾಲಿ ಆಗುತ್ತೆ, ಅನ್ನ ಅಲ್ಲೇ ಇರುತ್ತೆ. ಹಣ್ಣು ಕಂಡರಂತೂ ಶುರು ಅವಳ "ಕುಂಯ್, ಕುಂಯ್" ಅಂದ್ರೆ ಕುಯ್ದು ಕೊಡು ಅನ್ನೊ ಮಾತು. ಅದರಲ್ಲೂ ಬಾಳೆಹಣ್ಣು ತುಂಬಾನೆ ಇಷ್ಟ, ಅಮ್ಮ ಈಗ ಅದನ್ನ ಬಚ್ಚಿಡಿರೋ ಪರಿಸ್ಥಿತಿ ಬಂದಿದೆ. ಅವಳು ಆರು ತಿಂಗಳ ಮಗುವಿದ್ದಾಗಿಂದ ತೆಗೆದ ಹಲವು ಫೋಟೋಗಳು ಮತ್ತು ಇತ್ತೀಚೆಗೆ ಅವಳು ಫೋರ್ಕ್-ನಲ್ಲಿ ಹಣ್ಣು ತಿಂತಾಯಿರೋ ವಿಡೀಯೊ ಇಲ್ಲಿದೆ. ಜೊತೆಗೆ ಹಣ್ಣುಮಾರುವವನ ಹಾಡು.





ನಂಜನಗೂಡಿನ ರಸಬಾಳೆ
ತಂದಿಹೆ ಕೊಡಗಿನ ಕಿತ್ತೀಳೆ
ಬೀದರ ಜಿಲ್ಲೆಯ ಸೀಬೆಯ ಹಣ್ಣು
ಬೆಂಗಳೂರಿನ ಸೇಬಿನ ಹಣ್ಣು







ಕೊಳ್ಳಿರಿ ಹಿಗ್ಗನು ಹರಿಸುವವು
ಕಲ್ಲುಸಕ್ಕರೆಯ ಮರೆಸುವವು
.
.
.
.





ಕೊಳ್ಳಿರಿ ಮಧುಗಿರಿ ದಾಳಿಂಬೆ
ಬೆಳವಲ ಬಯಲಿನ ಸಿಹಿಲಿಂಬೆ
ಬೆಳಗಾವಿಯ ಸವಿ ಸಪೋಟ
ದೇವನ ಹಳ್ಳಿಯ ಚಕ್ಕೋತ






ನಾಲಿಗೆ ಬರವನು ಕಳೆಯುವವು
ದೇಹದ ಬಲವನು ಬೆಳೆಯುವೆವು

.
.
.
.
.
ಗಂಜಾಂ ಅಂಜೀರ್ ತುಮಕೂರ್ ಹಲಸು
ಧಾರವಾಡದ ಆಪೂಸು
ಮಲೆನಾಡಿನ ಅನನಾಸು
ಕೊಳ್ಳಿರಿ ಮರೆತು ಸಿಹಿ ತಿನಿಸು
.

ಕೊಲ್ಲಿರಿ ಬಗೆ ಬಗೆ ಹಣ್ಣುಗಳ
ಕನ್ನಡ ನಾಡಿನ ಹಣ್ಣುಗಳ

Read More

ಏಣಿ ಏರೋದು ಹೀಗೆ...

ಪುಟ್ಟಿ ಈಗ ಎಲ್ಲಿ ಮೆಟ್ಟಲು ಕಂಡ್ರೂ ಸರಿ ಹತ್ತಬೇಕು. ಮೊದಲೆಲ್ಲ ಅಮ್ಮನ ಕರೀತಾ ಇದ್ದ್ಲು ಜೊತೆಗೆ ಬಾ ಅಂತ. ಇತ್ತೀಚೆಗೆ ಧೈರ್ಯ ಹೆಚ್ಚಾಗಿ ತಾನೆ ಹತ್ತುತ್ತಾಳೆ. ಮೊನ್ನೆ ಅವರ ಅಜ್ಜ ಏಣಿ ಹತ್ತಿ ಕೆಲಸ ಮಾಡೋದನ್ನ ನೋಡಿದಳು. ಥಟ್ಟನೆ ತಾನೂ ಹತ್ತಬೇಕು ಅಂತ ಹಠಮಾಡಿ ತಾನೂ ಹತ್ತಿ ಎಲ್ಲರಿಂದ ಸೈ ಅನಿಸಿಕೊಂಡಳು.

Read More

ಪುಟ್ಟಿ ಕಣ್ಣೆಲ್ಲಿ?

ಪುಟ್ಟಿಗೆ ಎಣ್ಣೆ ಹಚ್ಚೋವಾಗ "ಕೈ ಉದ್ದ, ಕಾಲ್ ಉದ್ದ" ಅಂತ ಹೇಳ್ತಾ ಮಸಾಜ್ ಮಾಡೋದು ರೂಢಿ. ಅಲ್ಲದೆ ಅಜ್ಜಿ ಹೇಳೊ ಹಾಡು ತುಂಬಾ ಇಷ್ಟ.

ದೇವರು ನಮಗೆ ತಂದೆಯು

ಎರಡು ವರವ ಕೊಟ್ಟಿದ್ದಾನೆ

ಎರಡು ವರವು ಏನೆಂದ್ರೆ ಪುಟ್ಟ ಕಣ್ಣುಗಳು

ದೇವರಿಗೋಸ್ಕರ ಕಣ್ಣಗಳು

ಇರಬೇಕು ಎಲ್ಲರಿಗೂ

ಯಾವ ಕೆಟ್ಟ ನೋಟವನ್ನು ನೋಡಬಾರದು

ದೇವರು ನಮಗೆ ತಂದೆಯು
ಎರಡು ವರವ ಕೊಟ್ಟಿದ್ದಾನೆ
ಎರಡು ವರವು ಏನೆಂದ್ರೆ ಪುಟ್ಟ ಕೈಗಳು
ದೇವರಿಗೋಸ್ಕರ ಕೈಗಳು
ಇರಬೇಕು ಎಲ್ಲರಿಗೂ
ಯಾವ ಕೆಟ್ಟ ಕೆಲಸವನ್ನು ಮಾಡಬಾರದು

ದೇವರು ನಮಗೆ ತಂದೆಯು
ಎರಡು ವರವ ಕೊಟ್ಟಿದ್ದಾನೆ
ಎರಡು ವರವು ಏನೆಂದ್ರೆ ಪುಟ್ಟ ಕಾಲ್ ಗಳು
ದೇವರಿಗೋಸ್ಕರ ಕಾಲ್ ಗಳು
ಇರಬೇಕು ಎಲ್ಲರಿಗೂ
ಯಾವ ಕೆಟ್ಟ ಜಾಗಕೂ ಹೋಗಬಾರದು

ದೇವರು ನಮಗೆ ತಂದೆಯು
ಎರಡು ವರವ ಕೊಟ್ಟಿದ್ದಾನೆ
ಎರಡು ವರವು ಏನೆಂದ್ರೆ ಪುಟ್ಟ ಕಿವಿಗಳು
ದೇವರಿಗೋಸ್ಕರ ಕಿವಿಗಳು
ಇರಬೇಕು ಎಲ್ಲರಿಗೂ
ಯಾವ ಕೆಟ್ಟ ಮಾತನ್ನು ಕೇಳಬಾರದು

ದೇವರು ನಮಗೆ ತಂದೆಯು
ಒಂದು ವರವ ಕೊಟ್ಟಿದ್ದಾನೆ
ಆ ಒಂದು ವರವು ಏನೆಂದ್ರೆ ಪುಟ್ಟ ಬಾಯಿ
ದೇವರಿಗೋಸ್ಕರ ಬಾಯಿ
ಇರಬೇಕು ಎಲ್ಲರಿಗೂ
ಯಾವ ಕೆಟ್ಟ ಮಾತನ್ನು ಆಡಬಾರದು

ನಂದಗೋಕುಲದ ಅಮ್ಮುವಿನ ಅಮ್ಮ ಮಾಲಾ ಅವರು ಬರೆದ ಈ ಹಾಡು ಕೂಡ ಬಹಳ ಚೆಂದ ಇದೆ ಓದಿ.
ಇವೆಲ್ಲದರ ಪರಿಣಾಮ ಈಗ ತನ್ನ ಪುಟ್ಟ ಕೈ-ಕಾಲು ಇತರೆ ಅಂಗಾಂಗಗಳ ಪರಿಚಯ ಚೆನ್ನಾಗಿ ಆಗಿದೆ. ಎಲ್ಲವನ್ನು ಬೆರಳು ಮಾಡಿ ತೋರಿಸುತ್ತಾಳೆ.

Read More

ತಾಯಿತ ಯಾರು ಗೊತ್ತಾ??

ಅಪ್ಪ, ಅಮ್ಮ, ಪಾಪ, ತಾತಾ, ಮಾಮ ಇವಿಷ್ಟೆ ಮಾತಾಡುತ್ತಿದ್ದ ಪುಟ್ಟಿಗೆ ಈಗ ನಾವು ಮಾತಾಡೋದೆಲ್ಲ ಚೆನ್ನಾಗಿ ಅರ್ಥ ಆಗುತ್ತೆ. ತನಗೆ ಹಸಿವಾದ್ರೆ ಅಡಿಗೆ ಮನೆಗೆ ಕರೆದೊಯ್ದು ಬಟ್ಟಲು, ಸ್ಪೂನ್ ತೋರ್ಸಿತಾಳೆ. ನಿದ್ದೆ ಬಂದಾಗ ಹಾಸಿಗೆ ತೋರಿಸ್ತಾಳೆ. ಅಷ್ಟೆ ಅಲ್ಲ ತಾನೂ ಎಲ್ಲಾ ಮಾತಾಡಲು ಪ್ರಯತ್ನಿಸುತ್ತಾಳೆ.
ನಿನ್ನ್ ಹೆಸ್ರು ಏನು ಅಂದ್ರೆ "ತಾಯಿತ" ಅಂತ ಮುದ್ದಾಗಿ ಹೇಳ್ತಾಳೆ. ಸಾಹಿತ್ಯ ಯಾರು ಅಂತ ಪ್ರಶ್ನಿಸಿದ್ರೆ "ನಾಆಅನ್..ನಾಆಆನ್" ಅಂತ ತನ್ನ ಪುಟ್ಟ ಕೈಗಳಿಂದ ಎದೆ ತಟ್ಟುತ್ತಾಳೆ. ಅಮ್ಮ ಹೆಸ್ರೇನು ಅಂದ್ರೆ "ಊಪ, ಪೂಪ" ಅಂತ ನಗ್ತಾಳೆ. ನಾಯಿ ನೋಡಿದ್ರೆ "ದಾಗೀಈ.." ಅಂತ ತೋರಿಸ್ತಾಳೆ. ಡಾಗಿ ಏನ್ ಅನ್ನುತ್ತೆ ಅಂದ್ರೆ "ಬಾಬು..ಬೌಬು" ಅಂತಾಳೆ. ದೋಸೆ, ಚಪಾತಿ ಇವೆಲ್ಲ ಅವಳ ಬಾಯಲ್ಲಿ "ಚಾಪ" ಆದ್ರೆ, ಸೊಪ್ಪು "ತೊಪ್ಪು, ಚೊಪ್ಪು" ಆಗಿದೆ. ಬೆಕ್ಕು ನೋಡಿದ್ರೆ "ಮಯ್ಯ ಮಯ್ಯ" ಅಂತ ಸಂತಸ ಪಡ್ತಾಳೆ. ಅಮ್ಮನ ಕೈಯಲ್ಲಿ ಹಾಲಿನ ಲೋಟ ನೋಡಿದ್ರೆ ಬಹಳ ಖುಶಿಯಿಂದ "ಹಾಆಲ್...." ಅಂತಾಳೆ. ಸಂಜೆ ಹಾಲು ಕುಡಿದ ತಕ್ಷಣ ಚಪ್ಪಲಿ ತೋರಿಸಿ "ಚಪ್ಪ ಚಪ್ಪ" ಅಂತ ತನ್ನ ಕಾಲುಗಳನ್ನ ತೋರಿಸಿ ಹಾಕು ಅಂತ ಸನ್ನೆ ಮಾಡ್ತಾಳೆ. ನಿದ್ದೆ ಮಾಡಲು ಹಾಸಿಗೆ ಬಳಿ ಹೋದ್ರೆ "ತಾತಿ.. ತಾಗಿ" ಅಂತಾಳೆ. ಮುದ್ದು ಮಾಡೋ ಅಜ್ಜಿನ ಕಂಡು "ಅಗ್ಗಿ" ಅಂತ ಕೂಗ್ತಾಳೆ. ಅವಳು ಕೆನ್ನೆ ಮುತ್ತು ಕೊಟ್ಟಾಗ ಅಮ್ಮ ಥ್ಯಾಂಕ್ಯೂ ಅಂದ್ರೆ ತಾನೂ " ತಾಕ್" ಅಂತಾಳೆ. ಅಜ್ಜ ಪೂಜೆ ಮಾಡೋವಾಗ ಅವರ ಜೊತೆ ದೇವರಮನೆಲಿ ಕೂತು "ಊವಾ (ಹೂವು), ಅನ್ನ(ಹಣ್ಣು)" ತೋರಿಸ್ತಾಳೆ. ಮನೆಗೆ ಬರುವ ಅಕ್ಕ ಪಕ್ಕದ ಮನೆಯ ಮಕ್ಕಳನ್ನ "ಅತ್ತ, ಅನ್ನಾಆಅ..." ಅಂತ ಕರೆಯುತ್ತಾ ಅವರೊಂದಿಗೆ ಆಟವಾಡ್ತಾಳೆ. ಅವಳಿಗಿಷ್ಟವಾದ ಬಾಳೆಹಣ್ಣು ಕಾಣಿಸಿದ್ರೆ "ನಾನಾ" ಅಂತ ಕೈ ತೋರಿಸಿ ಕೇಳ್ತಾಳೆ.
ಅವಳ ಈ ಮುದ್ದು ಮಾತುಗಳನ್ನ ವಿಡಿಯೋ ರೆಕಾರ್ಡ್ ಮಾಡೋಣ ಅಂತ ಕ್ಯಾಮೆರಾ ಕೈಗೆತ್ತಿದರೆ ಸಾಕು ಪೋಸ್ ಕೊಟ್ಟು ನಗಲು ಶುರು ಮಾಡ್ತಾಳೆ. ಆಗ ಎಷ್ಟು ಮಾತಾಡ್ಸಿದ್ರೂ ನಗುನೇ ಮಾತಾಗುತ್ತೆ. ಆದ್ರೂ ಕೆಲವನ್ನು ರೆಕಾರ್ಡ್ ಮಾಡಿದ್ದೀನಿ. ಅದರ ತುಣುಕು ಇಲ್ಲಿದೆ ನೋಡಿ.

Read More

ಮೊಲದ ಮರಿ!!

ಹೆಬ್ಬಾಳದಲ್ಲಿ ಪ್ರಥಮ ಜಾನುವಾರು, ಕುಕ್ಕುಟ ಮತ್ಸ್ಯ ಮೇಳ ನಡೆದಾಗ ಪುಟ್ಟಿಗೆ ಪ್ರಾಣಿ-ಪಕ್ಷಿಗಳನ್ನು ತೋರಿಸೋಕೆ ಅಂತ ಅವರಪ್ಪ ಅವಳನ್ನ ಕರ್ಕೊಂಡ್ ಹೋಗಿದ್ರು. ಅವಳು ಮೊಲಗಳನ್ನು ನೋಡಿ ಖುಶಿ ಪಟ್ಟಿದ್ದು ಹೀಗೆ.

ಮೊಲದ ಮರಿ ಮೊಲದ ಮರಿ ಆಡ ಬಾರೆ

ಚುಪಕೆ ಚುಪಕೆ ಚುಪಕೆ ಚುಪಕೆ ನೆಗೆದು ಬಾರೆ

ದೊಡ್ಡದಾದ ಕಾಡಿನೊಳಗೆ ನಿನ್ನ ಠಾವೆ

ಹೆಡ್ಡ ನೀನು ಪೊದರಿನೊಳಗೆ ವಾಸಿಸುವೆ

ಪೊದರಿನಿಂದ ಪೊದರ ಬಳಿಗೆ ನಿನ್ನ ಆಟ

ಗಿಡದ ಚಿಗುರು ನಿತ್ಯ ನಿನಗೆ ಸೊಗಸಿನೂಟ

ಗಿಡ್ಡ ಬಾಲ ದೊಡ್ಡ ಕಿವಿಯು ನಿನಗೆ ಚಂದ

ಎದ್ದು ಎನ್ನ ಬಳಿಗೆ ಬಂದು ಆಡೋ ಕಂದಾ

ಗೂಡು ಕಟ್ಟಿ ತಿಂಡಿ ಕೊಡುವೆ ಪ್ರೀತಿಯಿಂದಾ

ಕಾಡ ಬಿಟ್ಟು ಗೂಡು ಸೇರೋ ಮೊಲದ ಕಂದಾ

ಮುದ್ದು ಮುದ್ದು ಮಾತುಗಳನು ನಿನಗೆ ಕಲಿಸುವೆ

ಮುದ್ದು ಮಾಡಿ ಪ್ರೀತಿಯಿಂದ ನಿನ್ನ ಸಲಹುವೆ

ಮೊಲದ ಮರಿ ಮೊಲದ ಮರಿ ಆಡ ಬಾರೆ
ಚುಪಕೆ ಚುಪಕೆ ಚುಪಕೆ ಚುಪಕೆ ನೆಗೆದು ಬಾರೆ

-- ಕೆಮ್ತೂರು ದೊಡ್ಡಣ್ಣ ಶೆಟ್ಟಿ

ಮೊಲದ ಮರಿ ಹಾಡು ಕೇಳಲು ಇಲ್ಲಿ ಕ್ಲಿಕ್ಕಿಸಿ.

Read More

ಸೀರೆಯುಟ್ಟ ಚೋರಿ!!!

ನನ್ನ ಸೋದರತ್ತೆಯ ಮಗನ ಮದ್ವೆಗೆ ಪುಟ್ಟಿಗೂ ಒಂದ್ ಪುಟ್ಟ್ ಸೀರೆ ಉಡಿಸಿ ಮೆರೆಸಿದ್ವಿ. ಒಂದ್ ಚೂರು ಗಲಾಟೆ ಮಾಡದೆ ಸಿಂಗಾರ ಮಾಡಿಸ್ಕೊಂಡು ಅವಳೂ ಖುಶಿ ಪಟ್ಲು. ಆಮೇಲೆ ಮದುವೆ ಮನೆ ತುಂಬಾ ಓಡಾಡಿ ಕೊಂಡಿದ್ದು ಎಲ್ಲರ ಮನ ಗೆದ್ಲು:)

ಪುಟ್ಟ್ ದೊಂದು ಸೀರೆ ಉಟ್ಟ್ಕೊಂಡು

ಹೊಟ್ಟೆನೆಲ್ಲ ತೋರ್ಸ್ ಕೊಂಡು
ಪುಟ್ಟ್ ಪುಟ್ಟ್ ಹೆಜ್ಜೆಯಿಟ್ಟು ಬಂದ್ಲು ಪೋರಿ
ಎಲ್ಲರ್ ಮನ್ಸನ್ನು ಗೆದ್ದು ಓಡಿದ್ಲು ಚೋರಿ !!

Read More

ನಮ್ಮ ಬಾವುಟ!

ಜನವರಿಯಲ್ಲಿ ಗಣರಾಜ್ಯೋತ್ಸವದ ದಿನದಂದು ತಾತನ ಮನೆಯೆದುರಿನಲ್ಲಿ ಕಾಲೋನಿಯವರು ನಡೆಸಿದ ಧ್ವಜಾರೋಹಣ ಸಮಾರಂಭದಲ್ಲಿ ಪುಟ್ಟಿ ಕೂಡ ಭಾಗವಹಿಸಿದ್ದಳು!

ಏರುತಿಹುದು ಹಾರುತಿಹುದು

ನೋಡು ನಮ್ಮ ಬಾವುಟ

ತೋರುತಿಹುದು ಹೊಡೆದು ಹೊಡೆದು

ಬಾನಿನಗಲ ಪಟಪಟ



ಕೇಸರಿ ಬಿಳಿ ಹಸಿರು ಮೂರು

ಬಣ್ಣ ನಡುವೆ ಚಕ್ರವು

ಸತ್ಯ ಶಾಂತಿ ತ್ಯಾಗ ಮೂರ್ತಿ

ಗಾಂಧಿ ಹಿಡಿದ ಚರಕವು



ಇಂತ ಧ್ವಜವು ನಮ್ಮ ಧ್ವಜವು

ನೋಡು ಹಾರುತಿರುವುದು

ಧ್ವಜದ ಶಕ್ತಿ ನಮ್ಮ ಭಕ್ತಿ

ನಾಡ ಸಿರಿಯ ಮೆರೆವುದು



ಕೆಂಪು ಕಿರಣ ತುಂಬಿ ಗಗನ

ಹೊನ್ನ ಬಣ್ಣವಾಗಿದೆ

ನಮ್ಮ ನಾಡ ಗುಡಿಯ ಬಣ್ಣ

ನೋಡಿರಣ್ಣ ಹೇಗಿದೆ

-- ಕಯ್ಯಾರ ಕಿಞ್ಞಣ್ಣ ರೈ

Read More

ಗಿರಿಗಿಟ್ಟಿ

ನನ್ನ ಚಿಕ್ಕಪ್ಪನ ಮಗನ ಎಂಗೇಜ್-ಮೇಂಟಿಗೆ ಊರಿಗೆ ಹೋದಾಗ ಅಲ್ಲಿ ಪುಟ್ಟಿ ಇತರ ಮಕ್ಕಳೊಂದಿಗೆ ಕೂಡಿ ಗಿರಿಗಿಟ್ಟಿ ಆಟವಾಡಿದ್ದಳು.

ಗಿರ ಗಿರ ತಿರುಗುವ ಗಿರಿಗಿಟ್ಟಿ
ಸುರಗಿ ಎಲೆಯ ಗಿರಿಗಿಟ್ಟಿ

ಕಡ್ಡಿಗೆ ಪೋಣಿಸಿ
ಕೈಯಲಿ ಹಿಡಿದು

ಗಾಳಿಗೆ ತಿರುಗುವ ಗಿರಿಗಿಟ್ಟಿ
ಗಿರ ಗಿರ ತಿರುಗುವ ಗಿರಿಗಿಟ್ಟಿ
--ಸುಬ್ರಹ್ಮಣ್ಯ ಭಟ್

Read More

ಕರಡಿ ಕುಣಿತ

ಪುಟ್ಟಿಗೆ ಪ್ರಾಣಿಗಳು ಅಂದ್ರೆ ತುಂಬಾ ಇಷ್ಟ. ಮೊದಲ ಸಾರಿ ಬೆಂಗಳೂರಿಗೆ ಹೋದಾಗ ಬಹಳಷ್ಟು ಪ್ರಾಣಿಗಳನ್ನ ನೋಡಿ ಖುಶಿ ಪಟ್ಟಳು., ಅವಳು ನೋಡಿದ ಲಿಸ್ಟ್ ನಲ್ಲಿ ಕರಡಿ ಕೂಡ ಇದೆ. ನನ್ನ ಚಿಕ್ಕಪ್ಪನ ಮಗನ ನಿಶ್ಚಿತಾರ್ಥಕ್ಕೆಂದು ಊರಿಗೆ ಹೋದಾಗ ದಾರಿಯಲ್ಲಿ ಸಿಕ್ಕಿತು ನಮಗೀ ಕರಡಿ. ಮನೆಯಲ್ಲಿ ಬಹಳಷ್ಟು bearಗಳಿವೆ, ಅವನ್ನ ಪುಟ್ಟಿ ಕರಿಯೋದು "ಬೇ, ಬೇ.." ಅಂತ. ಈಗ ಜೀವಂತ ಕರಡಿಯನ್ನ ತೋರಿಸಿ "ಬೇ ಬೇ" ಅಂತ ಹೇಳಿದಾಗ ಅದೇನು ಅರ್ಥ ಆಯಿತೋ ಗೊತ್ತಿಲ್ಲ, ಅಂತ ಖುಶಿಯಿಂದ ಚಪ್ಪಾಲೆ ತಟ್ಟಿದ್ಲು. ಜೊತೆಯಲ್ಲಿ ಮಾವನ ಮಗಳು ’ಖುಶಿ’ ಇದ್ದಿದರಿಂದ ಇನ್ನು ಹೆಚ್ಚಿನ ಸಂತಸ ಅವಳಿಗೆ.


ಕರಡಿ ಫೋಟೊ ಜೊತೆಗೆ ಇಲ್ಲಿದೆ ನೋಡಿ ಕರಡಿ ಹಾಡು...




ಯಾವ ಕಾಡಡವಿಯಲಿ ಜೇನುಂಡು ಬೆಳೆದಿದ್ದ
ಜಾಂಬುವಂತನ ಹಿಡಿದು ತಂದಾನೊ;
ಧಣಿಯರ ಮನೆ ಮುಂದೆ ಕಾವಲು ಮಾಡಣ್ಣ,
ಧಣಿ ದಾನ ಕೊಡುವನು’ ಎಂದಾನೊ.”

ಬೇಂದ್ರೆ

Read More

ಒಂಟೆ ಸವಾರಿ !!!

ಈಗ ಬೆಂಗಳೂರಿನ ಬಡಾವಣೆಗಳಲ್ಲಿ ರಾಜಾಸ್ತಾನ ಮರುಭೂಮಿಯಿಂದ ಬಂದಿರೋ ಒಂಟೆಗಳ ತಂಡಗಳು ಪ್ರತಿನಿತ್ಯ ಕಾಣಸಿಗುತ್ತೆ. ಮಕ್ಕಳಿಗೆಲ್ಲಾ ಒಂಟೆ ಸವಾರಿಯ ಮಜಾ ಬೇಸಿಗೆ ರಜೆಯ ಮಜವನ್ನು ಹೆಚ್ಚಿಸಿದೆ. ಒಂದು ರೌಂಡ್ ಹಾಕಿ ಬರಲು ಮಗುವೊಂದಕ್ಕೆ ರೂ.೧೦ ಪಡೆಯುತ್ತಾರೆ. ಎಲ್ಲಾ ಮಕ್ಕಳೊಡನೆ ಕೂಡಿ ಪುಟ್ಟಿಯೂ ಅಪ್ಪನೊಡನೆ ಒಂಟೆ ಸವಾರಿ ಮಾಡಿ ಮಜಾ ಮಾಡಿದ್ಲು.

ಒಂಟೆ ಬಂತು ಒಂಟೆ
ರಾಜಾಸ್ತಾನದ್ ಒಂಟೆ
ಕತ್ತಲ್ ಘಲ್ ಘಲ್ ಘಂಟೆ.

ಮೈ ಕಂದು ಬಣ್ಣ
ನೋಡು ಬಾರಾಣ್ಣ
ಕಿವಿ ಬಲು ಸಣ್ಣ.

ನಾಲ್ಕು ಕಾಲು ಇರುವುದು
ಉದ್ದ ಕತ್ತು ಇರುವುದು
ದಿನವು ಇಲ್ಲಿ ಬರುವುದು.

ನಾ ಸವಾರಿ ಮಾಡುವೆ
ಚಪ್ಪಾಳೆ ತಟ್ಟುವೆ
ಮತ್ತೆ ಬಾ ಎನ್ನುವೆ.

--ರೂpaश्री

Read More

ಬರ್ತ್ ಡೇ ಪಾರ್ಟಿ!!

ಪುಟ್ಟಿಗೆ ಇವತ್ತು ಖುಶಿಯೋ ಖುಶಿ. ಅವಳ ಹುಟ್ಟುಹಬ್ಬಕ್ಕೆ ಇಂಗ್ಲ್ಯಾಂಡಿನಿಂದ ಅವಳ ದೊಡ್ಡ ಸೋದರ ಮಾವ, ಅತ್ತೆ ಮತ್ತವರ ಮುದ್ದಿನ ಮಗಳು ಖುಶಿ, ಆಸ್ಟ್ರೇಲಿಯಾದಿಂದ ಚಿಕ್ಕ ಸೋದರಮಾವ, ಹೈದರಾಬಾದಿನಿಂದ ಅತ್ತೆ ಕುಟುಂಬ ಮತ್ತೆ ಇನ್ನು ಅನೇಕ ಸ್ನೇಹಿತರೂ ಹಿತೈಷಿಗಳೂ ಬಂದಿದ್ದರು. ಪಾರ್ಟಿಯಲ್ಲಿ ಅವಳ ಜೊತೆ ಆಡಲು ಮಿಕ್ಕಿ ಮೌಸ್ ಮತ್ತು ಡೋನಾಲ್ಡ್ ಅಂಕಲ್ ಕೂಡ ಬಂದಿದ್ರು. ಅಜ್ಜಿತಾತನ ಬಳಗ ದೊಡ್ಡದು, ಬಂದಿದ್ದ ೪೦೦ ಜನಗಳ ಜೊತೆ ಮಾತಾಡಿ ಫೋಟೋ ತೆಗೆಸ್ಕೊಂಡು ಸುಸ್ತಾದ್ಲು ಪುಟ್ಟಿ!! ಆದ್ರೂ ಮಜವಾಗಿತ್ತು ಅಂತ ಪಾರ್ತೀ ಅರೇಂಜ್ ಮಾಡಿದ್ದ ಅಜ್ಜಿತಾತರಿಗೆ ಥ್ಯಾಂಕ್ಸ್ ಹೇಳಿದ್ಲು:)

ಹೇಗಿದೆ ಪ್ರಿಂನ್ಸೆಸ್ಸ್ ಡೆಕೊರೇಶನ್!

ಆಹಾ! ನನ್ನ್ ಹೊಸ ಡ್ರೆಸ್ಸು

ಇದು ನನ್ನ್ ಕೇಕು:)

ಸೋದರಮಾವ ಕೊಡಿಸಿದ ಡ್ರೆಸ್ಸ್ ನಲ್ಲಿ ಮಿಂಚಿಂಗು !!

Read More

ಸತ್ಯನಾರಾಯಣ ಪೂಜೆ!!

ಸಾಹಿತ್ಯ ಮತ್ತವಳ ಸೋದರಮಾವನ ಮಗಳು ಖುಶಿಗೆ ಸಾಂಪ್ರದಾಯಿಕವಾಗಿ ನಾಮಕರಣ ಮಾಡೋಕೆ ಅಂತ ಅಜ್ಜಿತಾತ ಮನೇಲಿ ಎಲ್ಲಾ ಏರ್ಪಾಡು ಮಾಡಿದ್ದರು. ಆವತ್ತು ಪುಟ್ಟಿಯ ಜನ್ಮದಿನವೂ ಆದ್ದರಿಂದ ಸತ್ಯನಾರಾಯಣ ಪೂಜೆಯನ್ನೊ ಮಾಡಿಸಿದ್ರು. ಸಂಜೆ ಪಾರ್ಟಿ ಇರೋದ್ರಿಂದ ಪೂಜೆಗೆ ಕೇವಲ ಹತ್ತಿರದ ನೆಂಟರು ಅಂದ್ರೆ ೫೦ ಜನ ಮಾತ್ರ ಬಂದಿದ್ರು! ಪುಟ್ಟಿಯ ಅಮ್ಮನಿಗೆ ನಾಮಕರಣ, ಮದುವೆ ಮಾಡಿಸಿದ್ದ ಶ್ರೀ.ಸುಬ್ಬಾನಂಜುಂಡಶಾಸ್ತ್ರಿಗಳೆ ಇವತ್ತು ಪುಟ್ಟಿಗೆ ನಾಮಕರಣ ಮಾಡಿಸಲು ಬಂದಿದ್ದರು. 

ಪೂಜೆ

ಅಪ್ಪ ಮಗಳು

ರಸಾಯನ ಮಾಡುತ್ತಿರುವ ಆಂಟಿ, ಅಜ್ಜಿಯಂದಿರು

ಅಪ್ಪ ತನ್ನ ಹೆಸರನ್ನ ಸರಿಯಾಗಿ ಬರಿತಾರಾ ಅಂತ ನೋಡ್ತಾಯಿರೋ ಪುಟ್ಟಿ

ಪೂಜೆಯಾದ ಮೇಲೆ ದೇವರ ಮುಂದೆ ಒಂದು ಪೋಸು

ಮಾವನ ಮಗಳು ಖುಶಿಯೊಂದಿಗೆ

Read More

ಮಲಗಲು ಕಲಿತ ಪುಟ್ಟಿ !!

ಪುಟ್ಟಿ ಹುಟ್ಟಿದಾಗಿನಿಂದ ಮಲಗೋದು ಬಹಳ ಕಮ್ಮಿ. ಮೈಗೆಲ್ಲಾ ಎಣ್ಣೆ ಹಚ್ಚಿ ಸ್ನಾನ ಮಾಡಿಸಿ ಮಲಗಿಸಿದ್ರೆ ಕೇವಲ ಅರ್ಧ ಘಂಟೆಲಿ ಎದ್ದು ಆಟವಾಡ್ತಿದ್ಲು. ಹಗಲು ಹೇಗೋ ಅವಳೊಂದಿಗೆ ಆಟವಾಡ ಬಹುದಿತ್ತು, ಆದ್ರೆ ರಾತ್ರಿಯೆಲ್ಲ ಹೀಗೆ ಆದ್ರಿಂದ ಎಲ್ಲರಿಗೂ ಸಾಕು ಸಾಕಾಗ್ತಿತ್ತು. "ಮೊದಲ ೩ ತಿಂಗಳು ಹೀಗೆ, ಆಮೇಲೆ ಮಕ್ಕಳು ಸರಿ ಹೋಗ್ತಾರೆ" ಅಂತ ಪುಟ್ಟಿಯ ಅಜ್ಜಿ ಸಮಾಧಾನ ಮಾಡ್ತಾಯಿದ್ದ್ರು. ೩ ತಿಂಗಳು ತುಂಬಿದ ಮೇಲೂ ಪುಟ್ಟಿಯ ಆಟ ಮುಂದುವರೆಯಿತು. ಆಗ ಆರು ತಿಂಗಳಿಗೆ ಸರಿ ಹೋಗ್ತಾಳೆ ಅಂದ್ರು.
"ನಿಮ್ಮ ಪಕ್ಕ ಮಲಗಿಸಿಕೊಳ್ಳಬೇಡಿ. ಅವಳದ್ದೇ ಮಂಚದಲ್ಲಿ ಬೇರೆ ರೂಮಿನಲ್ಲಿ ಮಲಗಿಸಿ" ಅನ್ನೋ ಅವಳ ಡಾಕ್ಟರ್ ಹೇಳೊ ಹಾಗೆ ಮಾಡಲು ಮನಸ್ಸು ಒಪ್ಪಲಿಲ್ಲ. "ಮನೆದೇವರ ಹೆಸರು ಇಡದೆ, ಇನ್ನೇನೋ ಇಟ್ಟ್ರಿ ಅದಕ್ಕೆ ಹೀಗೆ ಆಡ್ತಾಳೆ" ಅಂತ ಪುಟ್ಟಿಯ ಅಜ್ಜಿ ತಾತರ ವಾದ.
ಒಂಬತ್ತು ತುಂಬಿದ್ರೂ ಅವಳ ಆಟ ನಿಲ್ಲದಾಗ "ರಾತ್ರಿ ಅವಳು ಎದ್ದು ಆಡಲು ಶುರು ಮಾಡಿದ್ರೆ, ನೀವು ಸುಮ್ಮನಿರಿ, ಅತ್ತರೆ ಅಳಲಿ, ಸ್ವಲ್ಪ ಹೊತ್ತು ಅತ್ತು ಸುಮ್ಮನಾಗ್ತಾಳೆ, ಮಲಗ್ತಾಳೆ.... ನನ್ನ ಮಗನೂ ಹೀಗೆ ಮಾಡ್ತಿದ್ದ ಒಂದು ದಿನ ೨ ಘಂಟೆ ಅಳಲು ಬಿಟ್ಟೆ, ಆಮೇಲೆ ತಾನೆ ಮಲಗಿದ" ಅನ್ನೋ ಸ್ನೇಹಿತರ ಮಾತು ಮೊದಲಿಗೆ ಸರಿಯೆನಿಸಲಿಲ್ಲವಾದ್ರೂ, ಕೊನೆಗೆ ಇರ್ಲಿ ನೋಡೋಣ ಅಂತ ಪ್ರಯತ್ನಿಸಿದ್ರೆ ೫ ನಿಮಿಷ ಅಳುವಷ್ಟರಲ್ಲೇ ಆ ಅಳು ಕೇಳಲು ಆಗಲಿಲ್ಲ. ಸರಿ, ಅದೆಷ್ಟು ದಿನ ಹೀಗೆ ಇರ್ತಾಳೆ ಇರ್ಲಿ ನೋಡೋಣ ಅಂತ ಸುಮ್ಮನಾದ್ವಿ.

ಇಂಡಿಯಾಗೆ ಬಂದು ೧ ವಾರದಲ್ಲೇ ಪುಟ್ಟಿ ಆರಾಮಾಗಿ ರಾತ್ರಿಯಿಡೀ ಮಲಗಲು ಶುರುಮಾಡಿದ್ಲು:)) ತನ್ನ ಮೊದಲ ವರ್ಷದ ಹುಟ್ಟುಹಬ್ಬಕ್ಕೆ ಅವಳು ಅಪ್ಪ ಅಮ್ಮನಿಗೆ ಕೊಟ್ಟ ಗಿಫ್ಟ್ ಇದು:))

Read More

ಪುಟ್ಟ ಕರು

ಪುಟ್ಟಿಗೆ ಈಗ ಬೀದಿಯಲ್ಲಿ ಬರುವ ಹಸು/ಎಮ್ಮೆಗಳನ್ನು ನೋಡಿದ್ರೆ ಬಹಳ ಸಂತೋಷ "ಬಾ,ಬಾ" ಅಂತ ಕೈ ಸನ್ನೆ ಮಾಡಿ ಕೂಗ್ತಾಳೆ. ಅಜ್ಜಿ ಕೊಡುವ ಬಾಳೆಹಣ್ಣು ತಿನ್ನೋ ಹಸುನ ನೋಡೋದೇ ಅವಳಿಗೆ ಬಲು ಖುಶಿ. ಊಟ ಮಾಡಲು ಹಠಮಾಡಿದಾಗ ಮನೆ ಹೊರಗೆ ಬಂದು ಅಂಬಾ ನೋಡುತ್ತಾ ನಿಂತ್ರೆ ನಿಮಿಷದಲ್ಲಿ ಊಟ ಖಾಲಿ.

ನಾನು ನೋಡಿದ ಪುಟ್ಟ ಕರು

ಹಸುವಿನ ಮರಿಯಿದು ಕರು

ನಾಲ್ಕು ಕಾಲುಗಳ್ಳುಳ್ಳ ಕರು

ಚೆಂಗು ಚೆಂಗನೆ ನೆಗೆಯುವ ಕರು

ಅಮ್ಮನ ಹಾಲು ಕುಡಿವ ಕರು
ಹುಲ್ಲನು ಮೇಯುವ ಕರು
ಕಂದು ಬಣ್ಣದ ಮೈಯ ಕರು
ಅಂಬಾ ಅಂಬಾ ಎಂದು ಕರೆವ ಕರು


ನಾ ಕೊಟ್ಟ ಬಾಳೆಹಣ್ಣು ತಿಂದ ಕರು
ನನ್ನನ್ನೇ ಹಿಂಬಾಲಿಸಿ ಬಂದ ಕರು
ನನ್ನ ಮೆಚ್ಚಿನ ಮುದ್ದು ಕರು
ನಾ ಹೋಗಿ ಬರುವೆ ನೀನಿಲ್ಲೇ ಇರು

-ರೂpaश्री

Read More

ಏರೋಪ್ಲೇನ್ ಏರಿದ ಪೋರಿ !!!

ಬೇಬಿ ಕಾರ್ ಸೀಟಿನಲ್ಲಿ ಕೂರಲು ಬಲು ಗಲಾಟೆ ಮಾಡುತ್ತಿದ್ದ ಪುಟ್ಟಿಯನ್ನ ಹೇಗಪ್ಪ ವಿಮಾನದಲ್ಲಿ ಭಾರತಕ್ಕೆ ಕರೆದೊಯ್ಯೋದು ಅನ್ನೋದು ಪುಟ್ಟಿ ಅಮ್ಮ-ಅಪ್ಪನ ಚಿಂತೆ ಆಗಿತ್ತು. ಆದ್ರೂ ಅವಳ ಮೊದಲ ವರ್ಷದ ಹುಟ್ಟುಹಬ್ಬವನ್ನ ಮನೆಯವರೆಲ್ಲರ ಜೊತೆ ಆಚರಿಸಬೇಕು ಅಂತ ಹೊರಟೇ ಬಿಟ್ಟ್ರು. ತಲಹಸೀಯಿಂದ ಬೆಂಗಳೂರಿಗೆ ಹೋಗೋಷ್ಟರಲ್ಲಿ ಪುಟ್ಟಿ-ಅಮ್ಮ-ಅಪ್ಪ ಎಲ್ಲರಿಗೂ ಸಾಕು ಸಾಕಾಯ್ತು.

ವಿಮಾನದಲ್ಲಿ ತನ್ನದೇ ತೊಟ್ಟಿಲಲ್ಲಿ ಮಲಗಿದ್ದು ಹೀಗೆ...

ಶಿಗಾಗೋ ವಿಮಾನನಿಲ್ದಾಣದಲ್ಲಿ ಮುಂದಿನ ಫ್ಲೈಟ್-ಗೆ ಕಾಯ್ದು ಸಾಕಾಗಿ ಅಲ್ಲೇ ಹಾಯಾಗಿ ನಿದ್ರಿಸಿದ್ದು ಹೀಗೆ...

ನಿದ್ರಿಸಿ ಸಾಕಾದಾಗ ತೊಟ್ಟಿಲಿನಲ್ಲೇ ಕುಳಿತು ಊಟ, ಆಟ ಎಲ್ಲಾ...

Read More