Showing posts with label ಹಬ್ಬ. Show all posts
Showing posts with label ಹಬ್ಬ. Show all posts

Wednesday, January 02, 2013

ಮತ್ತೆ ಬಂತು ಸಂಕ್ರಾಂತಿ...

ಸಂಕ್ರಾಂತಿ Sankranti Pongal
ಮತ್ತೆ ಬಂತು ಸಂಕ್ರಾಂತಿ
ಎಳ್ಳು ಬೆಲ್ಲದ ಜೊತೆಯಲ್ಲಿ
ದುಡಿಮೆಯ ಮುಗಿಸಿದ
ಸಂಭ್ರಮ ರೈತನ ಮುಖದಲ್ಲಿ

ಗುಡ್ಡೆಯ ಸಾಲು ಹೊಲದಿ
ಧಾನ್ಯ ಧವಸ ಕಾಳು
ಉದ್ದನೆ ಕಬ್ಬಿನ ಜಲ್ಲೆ
ಆಯ್ತು ಸಮ ಸಮ ಪಾಲು

ಜೋಡಿ ಎತ್ತಿಗೆ ಸಿಂಗಾರ
ಚೆಂದದ ಚಕ್ಕಡಿ ಜೊತೆಗೆ
ಹಳ್ಳಿಯ ವಾಹನ ಅದುವೆ
ಎಲ್ಲ ರೈತರ ಮನೆಗೆ

ಚಿಣ್ಣರಿಗೆಲ್ಲಾ ಸಂಜೆಗೆ ಆರತಿ
ಅಜ್ಜಿಯ ಹರಕೆಯ ಹಾಡು
ಸಂಕ್ರಾಂತಿ ಅಂದರೆ
ಸಂತಸ, ಸಂಭ್ರಮ ಗೂಡು

--ಎಸ್. ಆರ್. ಸತ್ಯ ಕುಮಾರ್

Saturday, July 28, 2012

ವರಮಹಾಲಕ್ಷ್ಮಿ ಹಬ್ಬ 2012

ಇಂದು ವರಮಹಾಲಕ್ಷ್ಮಿ ಹಬ್ಬ! ಬಹಳ ಸಂಭ್ರಮದಿಂದಲೇ  ಪುಟ್ಟಿ ಪೂಜೆ ಮಾಡಿದಳು. ಹೆಚ್ಚಿನ ಫೋಟೋಗಳು  ಇಲ್ಲಿವೆ.  
ವರಮಹಾಲಕ್ಷ್ಮಿ 

Monday, January 16, 2012

ಸಂಕ್ರಾಂತಿ 2012

ಈ ವರ್ಷ ಸಂಕ್ರಾಂತಿ ಹಬ್ಬದ ಫೋಟೋಗಳು ಇಲ್ಲಿವೆ. 

Monday, January 09, 2012

ಸಂಕ್ರಾಂತಿ ಚಟುವಟಿಕೆಗಳು

ಸಂಕ್ರಾಂತಿ ಕುರಿತು ಹೆಚ್ಚಿನ ಮಾಹಿತಿ ಮತ್ತು ವಿವರಗಳು ಇಲ್ಲಿ. 

ಹಬ್ಬಕ್ಕೆ ಸುಂದರ ಬ್ಯಾನರ್ ಮಾಡೊದು ಹೇಗೆ. 

ಸಂಕ್ರಾಂತಿ ಕಲರಿಂಗ್ ಪುಟಗಳು ಇಲ್ಲಿವೆ. 

Monday, April 04, 2011

ಯುಗಾದಿ ಹಬ್ಬ!

ಈ ವರ್ಷ ಹಬ್ಬಕ್ಕೆ ನಮ್ಮ ಮನೆಯ ಬಾಗಿಲುಗಳಿಗೆ ಮಾವಿನ ಬದಲು ಮಾಗ್ನೋಲಿಯಾ ಎಲೆಗಳ ತೋರಣ.
 ಯುಗಾದಿ ಹಬ್ಬಕ್ಕೆಂದು ಸ್ನೇಹಿತರೊಬ್ಬರು ತಮ್ಮ ಊರಿನಿಂದ ಬೇವಿನ ಎಲೆಗಳನ್ನು ಪೋಸ್ಟ್ ನಲ್ಲಿ ನಮಗಾಗಿ ಕಳುಹಿಸುತ್ತಿದ್ದರು. ಆದ್ರೆ ಈ ಸರ್ತಿ ಅದೂ ಇಲ್ಲವಾಯ್ತು, ಅವರ ಮನೆಯ ಹತ್ತಿರ ಮರವನ್ನು ಕಡಿದು ಹಾಕಿದರಂತೆ:( ಸರಿ, ಬೇವಿನ ಬದಲಿಗೆ ಹಾಗಲಕಾಯಿ ತುರಿಯನ್ನು ಬೆಲ್ಲದ ಜೊತೆ ಬೆರೆಸಿ "ಶತಾಯುರ್ ವಜ್ರ ದೇಹಾಯ, ಸರ್ವ ಸಂಪತ್ಕರಾಯಚ, ಸರ್ವಾರಿಷ್ಟ ವಿನಾಶಾಯ, ನಿಂಬಕ ದಳ ಭಕ್ಷಣಂ " ಅಂತ ಹೇಳಿಕೊಂಡು ತಿಂದೆವು. ಈ ಬೇವು ಬೆಲ್ಲ ತಿನ್ನುವುದರಿಂದ "ನೂರು ವರ್ಷ ಆಯಸ್ಸು, ವಜ್ರದಂತ ದೇಹ , ಸಂಪತ್ತು, ಎಲ್ಲ ಕೆಡಕುಗಳ ವಿನಾಶ" ಇವೆಲ್ಲ ಸಿಗುತ್ತೆ ಎಂದರ್ಥ.

ನಮ್ಮ ಹಬ್ಬದೂಟ.. ಇಷ್ಟೆಲ್ಲಾ ಇದ್ದರೂ ಹೋಳಿಗೆ ಇಲ್ಲವಲ್ಲಾ ಅನಿಸಿತು, ಬಾಳೆ ಎಲೆ ಇದ್ದಿದ್ದರೆ ಆಹಾ ....
 ಬೆಳಗ್ಗೆ ಹೊಸ್ತಿಲ ಬಳಿ ರಂಗೋಲಿ ಹಾಕುವಾಗ ಪುಟ್ಟಿ ತಾನೂ ಹಾಕುವುದಾಗಿ ಪುಡಿಯನ್ನು ಚೆಲ್ಲಾಡಿದ್ದಳು. ಸರಿ ಅದಕ್ಕೆ ಅಂತ ಸಂಜೆ ಅವಳಿಗೆ ಒಂದೆರೆಡು ರಂಗೋಲಿ ಬರೆದು ಬಣ್ಣ ತುಂಬಲು ಕೊಟ್ಟೆ.
 ಆದ್ರೆ ಅವಳು ತಾನೇ ರಂಗೋಲಿ ಬರೀಬೇಕು ಅಂತ ಇಷ್ಟಪಟ್ಟಳು. ಆಗಲಿ ಅಂತ ಚುಕ್ಕಿಗಳನ್ನು ಇಟ್ಟುಕೊಟ್ಟೆ, ನಾನು ಮಾಡಿದ್ದ ರಂಗೋಲಿಯನ್ನು ನೋಡಿಕೊಳ್ಳುತ್ತಾ ತಾನೂ ಮಾಡಿದಳು. ಭೇಷ್ ಪುಟ್ಟಿ ಅನಿಸಿತು:)

 

Monday, March 21, 2011

ಚೆಲ್ಲಿದರೋಕುಳಿಯಾ

 ಮೊದಲೇ ಅಂದಿಕೊಂಡಂತೆ ನಮ್ಮೂರಿನ ಭಾರತೀಯ ಅಸೋಷಿಯೇಶನ್ ಅವರು ಆಯೋಜಿಸಿದ್ದ ಹೋಳಿ ಹಬ್ಬದ ಆಚರಣೆಗೆ ನನ್ನ ನೆಗಡಿ ಹೆಚ್ಚಾಗಿದ್ದರಿಂದ ಹೋಗಲಾಗಲಿಲ್ಲ. ಪುಟ್ಟಿಗೆ ಇದು ಬಹಳ ಬೇಸರ ಮಾಡಿಸಿತ್ತು, ಅದಕ್ಕೆ ಮನೆಯಲ್ಲಿ ನಾವು ಮೂವರೇ ಸಣ್ಣದಾಗಿ ಒಬ್ಬರಿಗೊಬ್ಬರು ಬಣ್ಣಗಳನ್ನು ಹಚ್ಚಿಕೊಳ್ಳುತ್ತಾ ಆಟವಾಡಿದೆವು. ಪುಟ್ಟಿ ತನಗೆ ತಾನೇ ಬಣ್ಣ ಹಚ್ಚಿಕೊಳ್ಳುವುದು ಹೆಚ್ಚು ಮೋಜೆನಿಸಿತು. ತಟ್ಟೆಯಲ್ಲಿದ್ದ ಬಣ್ಣಗಳನ್ನೆಲ್ಲಾ ಕೈಗೆ ಹಚ್ಚಿಕೊಂಡಳು. ಬಣ್ಣಗಳಿಂದ ತುಂಬಿದ್ದ ಆ ಪುಟ್ಟ ಕೈಗಳನ್ನು ನೋಡುವುದೇ ಖುಶಿ:) ಕೊನೆಗೆ ಅವಳ ಇಡೀ ಮೈಯಿಗೆ ಬಣ್ಣ ಹಚ್ಚಿಕೊಂಡಿದ್ದಳು.
ಚಿಕ್ಕಂದಿನಲ್ಲಿ ಕೋಲಾಟವಾಡಿದ್ದ ಈ ಹಾಡು ನೆನಪಾಯ್ತು. ಈ ಹಾಡಿನ ಲಿಂಕ್ ಇದ್ರೆ ತಿಳಿಸಿ ಪ್ಲೀಸ್...

ಘಲ್ಲು ಘಲ್ಲೆನುತ ಗೆಜ್ಜೆ ಘಲ್ಲು ದಾದೆನುತ
ಬಲ್ಲಿದ ರಂಗನ್‌ ವಲ್ಲಿಯ ಮ್ಯಾಲೆ ಚೆಲ್ಲಿದರೋಕುಳಿಯಾ 
ಅರೆದರು ಅರಿಶಿಣವ ಅದಕೆ ಬೆರಸ್ಯಾರೆ ಸುಣ್ಣವ
ಅಂದವುಳ್ಳ ರಂಗನ್‌ ಮೇಲೆ ಚೆಲ್ಲಿದರೋಕುಳಿಯಾ 
ಹಾಲಿನೋಕುಳಿಯೋ ಒಳ್ಳೆ ನೀಲದೋಕುಳಿಯೋ
ಲೋಲನಾದ ರಂಗನ್‌ ಮ್ಯಾಲೆ ಚೆಲ್ಲಿದರೋಕುಳಿಯಾ
 ತುಪ್ಪದೋಕುಳ್ಲಿಯೋ ಒಳ್ಳೆ ಒಪ್ಪದೋಕುಳಿಯೋ
ಒಪ್ಪವುಳ್ಳ ರಂಗನ್‌ ಮ್ಯಾಲೆ ಚೆಲ್ಲಿದರೋಕುಳಿಯಾ
  
  

  

Saturday, March 19, 2011

ಬಣ್ಣಗಳ ಹಬ್ಬ ಹೋಳಿ

ಕೆಂಪು, ನೀಲಿ, ಹಳದಿ,ಗುಲಾಬಿ,ಹಸಿರು, ಕಂದು - ಎಲ್ಲೆಲ್ಲೂ ರಂಗು...ಇದು ಹೋಳಿ ಹಬ್ಬದ ಗುಂಗು!! ಬಣ್ಣಗಳ ಈ ಹಬ್ಬದ ಬಗ್ಗೆ ಪುಟ್ಟಿಗೆ ತಿಳಿಸುತ್ತಾ ಗೂಗಲ್ ನಲ್ಲಿದ್ದ ಒಂದಷ್ಟು ಫೋಟೋಗಳನ್ನು ತೋರಿಸಿದೆ. ಬಣ್ಣಗಳನ್ನು ಮೈಮೇಲೆಲ್ಲಾ ಹಾಕಿಕೊಂಡದನ್ನು ಕಂಡು ಖುಶಿಪಟ್ಟು "ನಾನೂ ಮಾಡ್ತೀನಿ ಅಮ್ಮ, ಇದು ಮುಖಕ್ಕೆ ಪೈಂಟ್ ಹಚ್ಚೋ ತರಹ!!" ಅಂದ್ಲು. ಆಯ್ತು ಕಂದ ಕಲರ್ಸ್ ತರ್ತೀನಿ ಅಂದೆ. ಸರಿ, ಇಲ್ಲಿನ ಭಾರತೀಯ ಅಸೋಸಿಯೇಷನ್ ಅವರು ಆಯೋಜಿಸುವ ಹೋಳಿ ಹಬ್ಬಕ್ಕೆ ಹೋಗೋಣ ಅಂತಂದೆ. ಜೊತೆಗೆ ಹೋಳಿಕಾ ದಹನದ ಕಥೆಯನ್ನೂ ನನಗೆ ತಿಳಿದಂತೆ ತಿಳಿಸಿದೆ. ಇದರ ಕುರಿತು ಯಾವುದಾದರು ವಿಡಿಯೋ ಸಿಕ್ಕರೆ ತಿಳಿಸಿ ಪ್ಲೀಸ್. 
ಜೊತೆಗೆ ಎಂದಿನಂತೆ ಪುಟ್ಟಿ ಮನೆಯಲ್ಲಿ ತನ್ನ ಬಣ್ಣಗಳ ಜೊತೆ ಆಟವಾಡಿದಳು. ಇದು ಅವಳು ಮಾಡಿದ ಹಬ್ಬದ ಶುಭಾಶಯ ಪತ್ರ.
ಯಾವುದೋ ಸಾಮಾನಿನ ಪ್ಯಾಕೇಜಿಂಗ್ ನಲ್ಲಿ ಬಂದಿದ್ದ ಪೇಪರ್ ಜೊತೆಗೆ ಬಣ್ಣಗಳನ್ನು ಪುಟ್ಟಿಗೆ ಕೊಟ್ಟೆ. ಬಹಳ ಖುಶಿಯಿಂದಲೇ ಪೈಂಟ್ ಮಾಡಿದಳು. ಎಲ್ಲೂ ಗ್ಯಾಪ್ ಬಿಡದೇ ಪೈಂಟ್ ಮಾಡೋದು ಈಗವಳಿಗೆ ಬಲು ಇಷ್ಟ. 
ಪೈಂಟ್ ಒಣಗಿದ ಮೇಲೆ ಬೇರೆ ಹಾಳೆಯ ಮೇಲೆ ಶುಭಾಶಯ ಬರೆದು, ಕಟ್ ಮಾಡಿ ಅಂಟಿಸಿದೆವು. ಇಂಗ್ಳೀಷ್ ನಲ್ಲಿ ಬರೆದು ಕಟ್ ಮಾಡಿದ್ದು ಪುಟ್ಟಿ. ನಂಗೆ ಕನ್ನಡ ಬರಲ್ಲ ನೀನು ಬರೀ ಅಮ್ಮ ಅಂತಂದ್ಲು :)

ನಿಮಗೆಲ್ಲರಿಗೂ ಬಣ್ಣಗಳ ಹಬ್ಬದ ಶುಭಾಶಯಗಳು !!!!


ಹೋಳಿ ಹೋಳಿ ಹೋಳಿ ಹೋಳಿ

ಏಳೇಳು ಬಣ್ಣದ ಬೆಳ್ಳಿ ಹೋಳಿ
ರಾಗ ರಂಗಿನ ರಂಗು ರಂಗೋಲಿ
ಕಾಮನ ಬಿಲ್ಲಿಂದ ಬಣ್ಣಗಳ ಕದಿಯೋಣ
ಮೋಡದ ಕಡಲಿಂದ ಪನ್ನೀರ ಕಡೆಯೋಣ
ಬಿಳಿ ಹೆತ್ತ ಬಣ್ಣಗಳ ಬಿಳಿ ಬಿಳಿ ಬಟ್ಟೆಗೆ ಚೆಲ್ಲೋಣ
ಓಹೋ ಓಕುಳಿ ಆಡೋಣ
  
  

Monday, January 17, 2011

ಸಂಕ್ರಾಂತಿಗೆ ಸಿಹಿ ಸರ

ಸಂಕ್ರಾಂತಿ ದಿನ ಸಂಜೆ ಮಕ್ಕಳಿಗೆ ಆರತಿ ಮಾಡೋವಾಗ ಸಿಹಿ ಕುಸುರಿ ಕಾಳಿನ ಹಾರವನ್ನು ಹಾಕೋದು ವಾಡಿಕೆ. ಇವುಗಳ ಬಗ್ಗೆ ಅಂತರ್ಜಾಲದಲ್ಲಿ ಹುಡುಕುತ್ತಿದ್ದಾಗ ಇದು ಮಹಾರಾಷ್ಟ್ರದಲ್ಲಿ ಹೆಚ್ಚು ಪ್ರಚಲಿತ ಅಂತ ತಿಳಿಯಿತು. ಅಲ್ಲಿಯವರು ಸಂಕ್ರಾಂತಿ ಸಮಯದಲ್ಲಿ ಮಾಡುವ "ಬೋರ್ ನಹನ್" (ಬೋರ್ ಅಂದ್ರೆ ಒಂದು ರೀತಿಯ ಸಣ್ಣ ಹಣ್ಣು, ಮತ್ತು ನಹನ್ ಅಂದ್ರೆ ಸ್ನಾನ) ಅನ್ನುವ ಆಚಾರಣೆ ಸಂದರ್ಭದಲ್ಲಿ ಚಿಕ್ಕ ಮಕ್ಕಳಿಗೆ ಕಪ್ಪು ಬಣ್ಣದ ಹೊಸ ಬಟ್ಟೆ ತೊಡಿಸಿ ಕುಸುರಿ ಕಾಳಿನಿಂದ ಮಾಡಿದ ಸರ, ಬಳೆ, ಕಿರೀಟ ಇತ್ಯಾದಿ ಒಡವೆಗಳನ್ನು ತೊಡಿಸಿ ಅಲಂಕರಿಸುವರಂತೆ. ಆಮೆಲೆ ಮಕ್ಕಳ ತಲೆಮೇಲೆ ಹಣ್ಣು ಮತ್ತಿತರೆ ವಸ್ತುಗಳನ್ನು ಚೆಲ್ಲಿ ಆರತಿ ಮಾಡುವರಂತೆ :)
 ಚಿತ್ರ ಕೃಪೆ ಅಂತರ್ಜಾಲ

ನಮಗಿಲ್ಲಿ ಅದು ಲಭ್ಯವಿಲ್ಲದೇ ಇರುವುದರಿಂದ ಅವುಗಳ ಬದಲಿಗೆ ಸಿಹಿ ಮಾರ್ಶ್ ಮೆಲ್ಲೋಸ್ ಪೋಣಿಸಿ ಹಾರ ಮಾಡಿದ್ದೆವು ಕಳೆದ ವರ್ಷ. ಈ ವರ್ಷ ಅದೇ ರೀತಿ ಹಾರಗಳನ್ನ ಪುಟ್ಟಿಯೇ ಬಣ್ಣಬಣ್ಣದ ಫ್ರೂಟ್ ಲೂಪ್ಸ್ ಪೋಣಿಸಿ ಮಾಡಿದಳು. ಮೊದಲು ಬಣ್ಣಗಳ ಪ್ರಕಾರ ಅವನ್ನು ಬೇರ್ಪಡಿಸಿ, ನಂತರ ತನಗೂ ಮನೆಗೆ ಬರುವ ತನ್ನ ಸ್ನೇಹಿತರಿಗೂ ಸುಂದರ ಹಾರಗಳನ್ನು ಮಾಡಿಟ್ಟಳು.
  

Sunday, January 16, 2011

ಸಂಕ್ರಾಂತಿ ಕಲರಿಂಗ್ ಪೇಜ್

ಸಂಕ್ರಾಂತಿ ಹಬ್ಬದ ವಿಶೇಷತೆಗಳನ್ನು ಬಿಂಬಿಸುವ ಒಂದೆರೆಡು ಕಲರಿಂಗ್ ಪೇಜ್ ಗಳನ್ನು ಗೂಗಲ್ ನಲ್ಲಿ ಸಿಕ್ಕ ಚಿತ್ರಗಳನ್ನು ಉಪಯೋಗಿಸಿಕೊಂಡು ಮಾಡಿಕೊಂಡೆ. ದಿನಕ್ಕೊಂದೆರೆಡು ಪೇಜ್ ಗಳಿಗೆ ಪುಟ್ಟಿ ಬಣ್ಣ ತುಂಬುತ್ತಿದ್ದಳು. ಅಕ್ಷರಗಳು ಸರಿಯಾಗಿ ಮೂಡದಿದ್ದರೂ ಕಲರಿಂಗ್ ಮಾಡಿದ್ದರ ಪರಿಣಾಮ ಜೊತೆಗೆ ನನ್ನ ಕಾಮೆಂಟರಿ ಎಲ್ಲಾ ಸೇರಿ ಇವತ್ತು ಪುಟ್ಟಿ ತಾತನ ಹತ್ರ ಫೋನ್ ನಲ್ಲಿ ಮಾತಾಡೋವಾಗ "ಸಂಕ್ರಾಂತಿ ಮಾಡಿದ್ವಿ" ಅಂತ ಹೇಳಿದ್ದು ಕೇಳಿ ನಾನು ಸಂತಸದಿಂದ ಸ್ವಲ್ಪ ಉಬ್ಬಿರುವೆ:)
ಕಲರಿಂಗ್ ಮಾಡಿರುವ ಕೆಲವು ಚಿತ್ರಗಳು..






Thursday, January 13, 2011

ಮಕರ ಸಂಕ್ರಾಂತಿ ಶುಭಾಶಯಗಳು

ಭಾರತದಲ್ಲಿ ಬೆಳೆವ ಮಕ್ಕಳಿಗೆ ನಮ್ಮ ಹಬ್ಬ ಹರಿದಿನಗಳ ಬಗ್ಗೆ ಹೇಳಿಕೊಡಲು ಯಾವುದೇ ಪಠ್ಯಪುಸ್ತಕ ಬೇಕಿಲ್ಲ. ಅಲ್ಲಿ ಸುತ್ತಲಿನ ಹಬ್ಬದ ವಾತಾವರಣವೇ ಕಲಿಸುತ್ತದೆ. ಯಾವ ಹಬ್ಬಕ್ಕೆ ಏನು ವಿಶೇಷ ಅನ್ನುವುದು ಆ ಹಬ್ಬದ ದಿನ ಮನೆಯ ಹತ್ತಿರದ ಅಂಗಡಿ/ ಮಾರುಕಟ್ಟೆಗೆ ಒಂದು ಸುತ್ತು ಹೋಗಿ ಬಂದರೆ ಸಾಕು:)
ಆದರೆ ಇದೆಲ್ಲದರಿಂದ ದೂರವಿರುವ ನನ್ನ ಪುಟ್ಟಿಗೆ ಇವುಗಳನ್ನ ನಾವೇ ಮನೆಯಲ್ಲಿ ಹೇಳಿಕೊಡಬೇಕು. ಇಲ್ಲಿನ ಹಬ್ಬಗಳು/ ಆಚರಣೆಗಳು ಬಂತೆಂದರೆ ಶಾಲೆಗಳಲ್ಲಿ ಆ ವಾರ/ ತಿಂಗಳೆಲ್ಲಾ ಬರೀ ಅದೇ ಹಬ್ಬದ ಪುಸ್ತಕ ಓದೋದು, ಅದೇ ಹಾಡುಗಳು, ಅದೇ ಥೀಮಿನ ಕಲೆ ಮಾಡಿಸುವುದು, ಹಬ್ಬದ ತಿಂಡಿ ಇತ್ಯಾದಿ. ನಾನೂ ಕೂಡ ಇನ್ನು ಮೇಲೆ ಇದೇ ಮಾರ್ಗದಲ್ಲಿ ಪುಟ್ಟಿಗೆ ನಮ್ಮ ಹಬ್ಬಗಳ ಬಗ್ಗೆ ತಿಳಿಸಿಕೊಡಬೇಕೆಂದು ಅಂದುಕೊಂಡಿದ್ದೆ.
ಸಂಕ್ರಾಂತಿಗೆ ಒಂದು ಪವರ್ ಪಾಯಿಂಟ್ ಸ್ಲೈಡ್ ಶೋ ಮಾಡೋಣವೆಂದಿದ್ದೆ, ಆದ್ರೆ ಮನೆಯಲ್ಲಿ ೧-೨ ತಿಂಗಳಿನಿಂದ ಎಲ್ಲರಿಗೂ ಬಿಡದೇ ನೆಗಡಿ/ಕೆಮ್ಮು ಸತಾಯಿಸುತ್ತಿದೆ, ಇವುಗಳ ಮದ್ಯೆ ಏನೂ ಮಾಡಲಾಗಲಿಲ್ಲ. ಗೂಗಲ್ ನಲ್ಲಿರುವ ಕೆಲವು ಹಬ್ಬದ ಚಿತ್ರಗಳನ್ನು ತೋರಿಸುತ್ತಾ ಪುಟ್ಟಿಗೆ ಸಂಕ್ರಾಂತಿ ಬಗ್ಗೆ ನಂಗೆ ತಿಳಿದಷ್ಟು ಹೇಳ್ತಾ ಬಂದಿರುವೆ.
ಜೊತೆಗೆ ಹಬ್ಬದ ಶುಭಾಶಯಗಳ ಬ್ಯಾನರ್ ಕೂಡ ಅವಳೇ ಪೈಂಟ್ ಮಾಡಿದ್ದಾಳೆ ನೋಡಿ ಹೇಗಿದೆ.

ಕಾಫಿ ಫಿಲ್ಟರ್ ಪೇಪರ್ ಅನ್ನು ಸೂರ್ಯನ ಕಿರಣಗಳಂತೆ ಕಾಣುವಂತೆ ಕತ್ತರಿಸಿ ಪೈಂಟ್ ಮಾಡಲು ಪುಟ್ಟಿಗೆ ಬಣ್ಣಗಳನ್ನು ಕೊಟ್ಟೆ. ಈ ಪೇಪರ್ ಮೇಲೆ ಪೈಂಟ್ ಮಾಡುವುದು ಪುಟ್ಟಿಗೆ ಬಲು ಇಷ್ಟ, ಬಣ್ಣಗಳು ಸುಲಭವಾಗಿ ಹರಡಿ, ಬೆರೆತುಕೊಳ್ಳುತ್ತವೆ. ಮುಂಚೆಯೂ ಬಹಳಷ್ಟು ಸರ್ತಿ ಇದರ ಮೇಲೆ ಪೈಂಟ್ ಮಾಡಿದ್ದಾಳೆ. ಸೂರ್ಯ ಮಾಡಬೇಕಿದ್ದರಿಂದ ಹಳದಿ, ಕೆಂಪು ಮತ್ತು ಕಿತ್ತಳೆ ಬಣ್ಣವನ್ನು ಮತ್ರ ಕೊಟ್ಟೆ. ಪೈಂಟ್ ಮಾಡಿದ ಮೇಲೆ ಪ್ರಿಂಟ್ ಮಾಡಿದ ಅಕ್ಷರಗಳನ್ನು ಅವಕ್ಕೆ ಅಂಟಿಸಿ ಗೋಡೆಗೆ ಹಾಕಿರುವೆ!!
ನಿಮಗೆಲ್ಲರಿಗೂ ಮಕರ ಸಂಕ್ರಾಂತಿ ಹಬ್ಬದ ಶುಭಾಶಯಗಳು !!

Thursday, November 04, 2010

ದೀಪಾವಳಿಯ ಶುಭಾಶಯಗಳು!!

ದೀಪವಿರಲಿ ಮನದಲಿ,
ಬೆಳಗಲಿ ಕನಸುಗಳಾ
ಕರಗಿಸಲಿ ಕತ್ತಲೆಯಾ! 
 ನಿಮಗೆಲ್ಲರಿಗೂ ಬೆಳಕಿನ ಹಬ್ಬ ದೀಪಾವಳಿಯ ಶುಭಾಶಯಗಳು!!

ಪೇಪರ್ ಲ್ಯಾಂಟರ್ನ್...

ದೀಪಾವಳಿಗೆ ಆಕಾಶಬುಟ್ಟಿ ಮಾಡಿ ಅದರೊಳಗೊಂದು ಸಣ್ಣ ದೀಪವನ್ನು ಹಚ್ಚಿ ಮನೆಯ ಮುಂದೆ ನೇತು ಹಾಕುವುದನ್ನು ಅಮ್ಮ ಹೇಳಿದ್ದನ್ನು ಕೇಳಿದ್ದೆ. ಬೆಂಗಳೂರಿನಲ್ಲಿ ಕೆಲವರು ಮನೆಯ ಮುಂದೆ ಹಾಕಿದ್ದ ಅಂಗಡಿಯಲ್ಲಿ ಸಿಗುವ ’ಬಟ್ಟೆಯ ಆಕಾಶಬುಟ್ಟಿ’ ಯನ್ನು ನೋಡೂ ಇದ್ದೆ. ಅದು ಮತ್ತೆ ಇನ್ನೂ ಕೆಲವು ದೀಪಾವಳಿಯ ಆಚರಣೆ  ನಶಿಸುತ್ತಿರುವ ಬಗ್ಗೆ ಒಂದು ಲೇಖನ ಇಲ್ಲಿ.
ಮೊನ್ನೆ ನಡೆದ ’Asian festival' ನಲ್ಲಿ ಥೈಲಾಂಡಿನವರ ಬೂತಿನಲ್ಲಿ ಮಕ್ಕಳಿಗೆ ಮಾಡಿಸುತ್ತಿದ್ದ ಪೇಪರ್ ಲ್ಯಾಂಟರ್ನ್ ಪುಟ್ಟಿ ಕೂಡ ಮಾಡಿದ್ದಳು. ಅದು ಮಾಡಲು ಬಲು ಸುಲಭ.

ಸರಿ, ನಾವೂ ಕೂಡ ನಮ್ಮ ಹಬ್ಬಕ್ಕೆ ಮಾಡೋಣ ಅಂತ ಶುರು ಮಾಡಿದೆವು. ಮೊದಲು ಮಾಡಿದ್ದು ಸರಿಯಾಗಲಿಲ್ಲ. ತಪ್ಪಾಗಿ ಕಟ್ ಮಾಡಿದೆವು. ಆದ್ರೆ ಅದನ್ನು ಅಂಟಿಸಿದಾಗ, ಅದು ಹೀಗಾಯ್ತು!

ನಂತರ ಕೆಲವನ್ನು ಮಾಡಿಯೇ ಬಿಟ್ಟೆವು...

ಕೆಲವನ್ನು ಪೈಂಟ್ ಮಾಡಿದಳು, ಕೆಲವರಲ್ಲಿ ಮಾರ್ಕರ್/ ಕ್ರಯಾನ್ಸ್ ನಿಂದ ಸಿಂಗರಿಸಿದ್ದಳು. . ಕತ್ತರಿಸುವಾಗ ಪುಟ್ಟಿಗೆ ಸಹಾಯವಾಗಲೆಂದು ಹಾಳೆ ಹಿಡಿದೆ. ಕೆಲವೊಂದು ಸ್ವಲ್ಪ ಹೆಚ್ಚಾಗಿ ಕಟ್ ಕೂಡ ಆಯ್ತು:) ಯಾವುದೂ ಪರ್ಫೆಕ್ಟ್ ಆಗಿಲ್ಲ, ಪರ್ವಾಗಿಲ್ಲ:)  ಇವುಗಳು ಈಗ ಅಡುಗೆ ಮನೆಯ ಬಾಗಿಲಲ್ಲಿವೆ!

ನೀವೂ ಕೂಡ ಮಾಡಬೇಕೆ? ಹಾಗಾದ್ರೆ ನೋಡಿ ವಿಡಿಯೋ ಇಲ್ಲಿದೆ. ಒಳಗಿನ ಪೇಪರ್ ಟ್ಯೂಬ್ ಇಲ್ಲದೆಯೂ ಮಾಡಬಹುದು.

Wednesday, November 03, 2010

ಪೇಪರ್ ದೀಪಗಳ ಹಾರ...

ಪುಟ್ಟಿ ಪೈಂಟ್ ಮಾಡಿರೋ ಕೆಲವು ಹಾಳೆಗಳನ್ನು ಅರ್ಧ ಸರ್ಕಲ್ ಆಗಿ ಕತ್ತರಿಸಿದೆ. ಒಂದು ಹಾ;ಎ ಪೂರ್ತಿ ಹಳದಿ ಬಣ್ಣ ಪೈಂಟ್ ಮಾಡಿಸಿ, ಅದನ್ನು 'tear shape'ನಲ್ಲಿ ಕಟ್ ಮಾಡಿ, ಮದ್ಯ ಸ್ವಲ್ಪ ಕೆಂಪು ಹಾಕಿ ದೀಪಗಳನ್ನು ಮಾಡಿದೆವು. ಅವುಗಳನ್ನು ಹಬ್ಬದ ದಿನ ಡೈನಿಂಗ್ ಟೇಬಲ್ ನಲ್ಲಿ ಹೀಗೆ ಜೋಡಿಸಿಡುವ ಇರಾದೆ ನನಗಿತ್ತು.
ಅಥವಾ ಬಾಗಿಲಿಗೆ ತೋರಣದ ತರಹ ಈ ದೀಪಗಳ ಹಾರ ಹಾಕಬಹುದಿತ್ತು!
ಆದ್ರೆ, ಪುಟ್ಟಿಯ ಐಡಿಯಾ ಬೇರೆಯಗಿತ್ತು. ಮೊನ್ನೆ ಹ್ಯಾಲೋವೀನ್ ಗೆಂದು ಮಾಡಿದ್ದ ವ್ರೆತ್ ಹಬ್ಬ ಮುಗಿದ ಮೇಲೆ ತೆಗೆದು ಹಾಕಿದ್ದೆ. ಹಾಗಾಗಿ ಅಲ್ಲಿಗೆ ಇವನ್ನು ಅಂಟಿಸಬೇಕೆಂಬ ಆಸೆ ಅವಳದ್ದು. ಕೊನೆಗೆ ಅವಳ ಆಸೆಯೇ ಸದ್ಯಕ್ಕೆ ಗೆದ್ದಿದೆ:)

Monday, October 04, 2010

ಗಣಪನ ಹಬ್ಬ 2010 !!

                                                                    ಬೆನಕ ಬೆನಕ ಏಕದಂತ
ಪಚ್ಚೆ ಕಲ್ಲು ಪಾಣಿ ಮೆಟ್ಲು
ಮುತ್ತಿನುಂಡೆ ಹೊನ್ನಗಂಟೆ
ಒಪ್ಪುವ ಶ್ರೀ ವಿಘ್ನೇಶ್ವರನಿಗೆ
21 ನಮಸ್ಕಾರಗಳು !




ಈ ನಮ್ಮ ಗಣಪನ ಮೆಚ್ಚಿ ಶೃತಿಯವರು ತಮ್ಮ ಬ್ಲಾಗಿನಲ್ಲಿ ಅವರು ಪ್ರತಿ ತಿಂಗಳೂ ನಡೆಸುವ ಸ್ಪರ್ಧೆಗೆ ಸೇರಿಕೊಂಡಿದ್ದರು, ನಮಗೆ ಬಹುಮಾನನೂ ಕೊಟ್ಟಿದ್ದಾರೆ. ಜೊತೆಗೆ ಮತ್ತಷ್ಟು ಬಹುಮಾನ ಕೊಡುತ್ತಿರುವ ವಿನುತಾ ಅವರಿಗೂ ವಂದನೆಗಳು!



Monday, March 15, 2010

ಯುಗಾದಿ ಹಬ್ಬ !!!





ವರುಷದ ಮೊದಲು
ಬಂದಿತು ಹಬ್ಬ
ಯುಗಾದಿ ಅದರ ಹೆಸರಣ್ಣ


ಬೇವು ಬೆಲ್ಲವ ತಿಂದು
ಕಷ್ಟ ಸುಖ ಸಮನಾಗಿ
ನೋಡೋಣ ಬಾರಣ್ಣ

ಎಣ್ಣೆಯ ಹಚ್ಚಿ
ಸ್ನಾನ ಮಾಡಿ
ಹೊಸ ಬಟ್ಟೆಯನು ಧರಿಸೋಣ

ಮಾವಿನ ಬೇವಿನ
ತೋರಣ ಮಾಡಿ
ಬಾಗಿಲಿಗೆ ಕಟ್ಟೋಣ

ಪೂಜೆಯ ಮಾಡಿ
ಭಟ್ಟರು ಓದುವ
ಪಂಚಾಂಗವ ಕೇಳೋಣ


ಅಮ್ಮನು ಮಾಡುವ
ಬಿಸಿಬಿಸಿ ಹೋಳಿಗೆ
ಸವಿಯನು ಸವಿಯೋಣ


ಸಾಲಲಿ ಕೂತು
ಬಾಳೆಯ ಎಲೆಯಲ್ಲಿ
ಹಬ್ಬದೂಟವ ಮಾಡೋಣ

ತಿಂದು ತೇಗಿ
ಆಟವ ಆಡಿ
ಎಲ್ಲರಿಗೂ ಶುಭವ ಕೋರೋಣ
--ರೂpaश्री

ಎಲ್ಲರಿಗೂ ಯುಗಾದಿ ಹಬ್ಬದ ಶುಭಾಶಯಗಳು!! ಬೆಂಗ್ಳೂರಿಂದ ಅಜ್ಜಿ-ತಾತಾ ಬಂದಿರೋದ್ರಿಂದ ಪುಟ್ಟಿ ಈಗ ಬಹಳ ಬಿಜಿ. ಜೊತೆಗೆ ನನ್ನ ಕೆಲಸ ಹೆಚ್ಚಾಗಿ/ ಸೋಮಾರಿತನ ಜಾಸ್ತಿಯಾಗಿ ಪುಟ್ಟಿ ಬ್ಲಾಗ್ ಇದುವರೆಗೆ ಒಂದು ಸಣ್ಣ ಬ್ರೇಕ್ ತಗೊಂಡಿತ್ತು. ಪ್ರೀತಿಯಿಂದ ವಿಚಾರಿಸಿದ ಎಲ್ಲರಿಗೂ ವಂದನೆಗಳು:)
ಮತ್ತೆ ಸಿಗೋಣ!

Sunday, January 17, 2010

ಸಂಕ್ರಾಂತಿ ಹಬ್ಬ 2010!

ಎಳ್ಳು ಬೀರಲು ಹೊರಟಿರುವ ಪುಟ್ಟಿ :)
ಈ ವರ್ಷ ಹಬ್ಬದ ದಿನ ಹೇಮಂತ್ ಕೆಲಸದ ಮೇಲೆ ದೂರದೂರು ಸ್ಯಾಂಡಿಯಾಗೋದಲ್ಲಿದ್ದರಿಂದ, ಮನೆಯಲ್ಲಿ ನಾವಿಬ್ಬ್ರು ಅಮ್ಮ ಮಗಳದ್ದೇ ಹಬ್ಬದ ಸಂಭ್ರಮ! ಕ್ಯಾಮೆರಾ ಹೇಮಂತ್ ಜೊತೆ ಹೋಗಿದ್ದರಿಂದ ಈ ಬಾರಿ ಪುಟ್ಟಿಯ ಆರತಿ ಫೋಟೊ ಇರುವುದಿಲ್ಲ ಅಂದುಕೊಂಡಿದ್ದೆ. ಆದ್ರೆ ಗೆಳತಿ ಅರ್ಚನಾಳಿಂದಾಗಿ ನಿಮ್ಮೊಂದಿಗೆ ಹಂಚಿಕೊಳ್ಳಲು ಹಬ್ಬದ ಫೋಟೋಗಳಿವೆ:) ತನ್ನ ಮಗ 'ಶಿಶಿರ್'ನ ಮೊದಲ ಸಂಕ್ರಾಂತಿಗೆ ಆರತಿ ಮಾಡಲು ಮನೆಗೆ ಕರೆದಳು. ಜೊತೆ ನಮ್ಮ ಪುತ್ತಿಗೂ ಅಲ್ಲಿಯೇ ಆರತಿ ಮಾಡೋಣವೆಂದಳು. ಮನೆಯಲ್ಲಿ ಒಬ್ಬಳೇ ಮಾಡುವುದಕ್ಕಿಂತ ಅಲ್ಲಿ ಅವರ ಜೊತೆಗೂಡಿ ಹಬ್ಬ ಮಾಡೋಣವೆನಿಸಿ, ಸಂಜೆ ಅವರ ಮನೆಗೆ ಹೋಗಿದ್ವಿ.

ಸಂಕ್ರಾಂತಿಯಲ್ಲಿ ಸಂಜೆ ಆರತಿ ಮಾಡುವಾಗ ಮಕ್ಕಳಿಗೆ ಕುಸುರಿ ಕಾಳಿನ ಹಾರ ಹಾಕಿ ಅಲಂಕರಿಸುವುದು ಕೆಲವರಲ್ಲಿ ವಾಡಿಕೆ. ಅದು ನಮಗಿಲ್ಲಿ ಲಭ್ಯವಿಲ್ಲದಿರುವುದರಿಂದ ಅದರ ಬದಲಿಗೆ ಸಿಹಿ ಮಾರ್ಶ್-ಮೆಲ್ಲೊಸ್ ನ ಸುಂದರ ಹಾರ ಮಾಡಿದ್ಲು ಅರ್ಚನಾ. ಆಂಟಿ ಮಾಡಿಕೊಟ್ಟ ಹೊಸ ಸರ ಪುಟ್ಟಿಗೆ ಭಾರಿ ಇಷ್ಟವಾಯಿತು:)

ಆರತಿಗೆ ಸಿದ್ದವಾಗಿರುವ ಸಾಹಿತ್ಯ - ಶಿಶಿರ್!!
ಇದೇ ರೀತಿ ಸಕ್ಕರೆ ಕಾಳಿನ ಹಾರ ಹಾಕುವ ಸಂಪ್ರದಾಯ ಉತ್ತರ ಕರ್ನಾಟಕದಲ್ಲೂ ಇದೆಯಂತೆ. ಅಲ್ಲದೇ ಮರಾಠಿಗರು ನಮ್ಮ ಯುಗಾದಿ ದಿನದಂದು ಅವರು ಆಚರಿಸುವ ಹೊಸ ವರ್ಷ ’ಗುಡಿಪಡ್ವಾ’ ದಂದು ಕೂಡ ಪುಟ್ಟ ಮಕ್ಕಳಿಗೆ ಸಕ್ಕ್ರೆ ಹಾರ ತೊಡಿಸಿ ಅಲಂಕಾರ ಮಾಡುತ್ತಾರೆಂದು ಅಮ್ಮುವಿನಮ್ಮ ಹೇಳಿದ್ದಾರೆ.

ನಮ್ಮಲ್ಲಿ ಎಳ್ಳು ಬೆಲ್ಲದ ಮಿಶ್ರಣ, ಕಬ್ಬಿನ ಚೂರು , ಕಾಸು, ಎಲಚಿ ಹಣ್ಣು ಇವುಗಳನ್ನ ಮಕ್ಕಳ ತಲೆ ಮೇಲೆ ಎರೆಯುವುದು ರೂಢಿ. ಇಲ್ಲಿ ಎಲಚಿ ಹಣ್ಣನ್ನು ಉಪಯೋಗಿಸುವುದರ ಉದ್ದೇಶ ಅದು ನೋಡಲು ಸೂರ್ಯನಂತೆ ಕೆಂಪಗೆ ಮತ್ತು ದುಂಡಗೆ ಇರುತ್ತದೆ ಎಂಬುದು. ಅಂದ್ರೆ ಈ ಹಣ್ಣು ತಲೆ ಮೇಲೆ ಬೀಳುವುದರಿಂದ ಸೂರ್ಯ ಆಶೀರ್ವಾದ ಪಡೆದಂತೆ ಅರ್ಥ! ಈಗ ನನಗನಿಸಿದ್ದು, ಎಳಚಿಹಣ್ಣಿನ ಬದಲಿಗೆ ಚೆರ್ರಿ ಹಣ್ಣನ್ನೋ ಅಥವಾ ಇನ್ಯಾವುದಾರು ಕೆಂಪನೆ ಬೆರ್ರಿಯನ್ನೋ ಉಪಯೋಗಿಸಬಹುದೇನೋ ಅಂತ!!

ನೆನಸಿದ ಕಡ್ಲೆಕಾಳು, ಗೋಡಂಬಿ, ಬಾದಾಮಿ, ಕಾಸು ಇವುಗಳನ್ನು ಎರೆಯುತ್ತಿರುವುದು..



ನಮ್ಮಂತೆಯೇ ಕೆಂಪುನೀರಿನ ಆರತಿ ಅಲ್ಲದೇ, ಗೋದಿಹಿಟ್ಟಿನ ದೀಪಗಳನ್ನು ಮಾಡಿ ಅದರ ರಕ್ಷೆಯಿಟ್ಟದ್ದು ನನಗೆ ಹೊಸ ವಿಚಾರ!

ಗೋದಿಹಿಟ್ಟಿನ ದೀಪಗಳ ರಕ್ಷೆ ಮಕ್ಕಳಿಗೆ...

ಇದಲ್ಲದೇ ನಮ್ಮ ತಾಯಿಯವರು ಚಿಕ್ಕಂದಿನಲ್ಲಿ ಕಳಸದಲ್ಲಿದ್ದಾಗ ಅಲ್ಲಿ ಹಬ್ಬದ ದಿನ ಎಳ್ಳು ಬೀರುವುದು ಮದುವೆಯಾದ ಹೆಂಗಸರು ಮಾತ್ರವಂತೆ. ಆದ್ರೆ ಮಾರನೆಯ ದಿನ ಚಿಕ್ಕ ಚಿಕ್ಕ ಮಕ್ಕಳು ಗೊಂಬೆ ಆಕಾರದ ಡಬ್ಬಿಗಳಲ್ಲಿ ಎಳ್ಳು ತುಂಬಿ ಬೀರುತ್ತಿದ್ದರಂತೆ, ಅದಕ್ಕೆ 'ಗೊಂಬೆ ಎಳ್ಳು' ಅಂತ ಕೆರೆಯುವರಂತೆ:)
ಹಬ್ಬಕ್ಕೆ ವಿಶ್ ಮಾಡಲು ಗೆಳತಿ ಸ್ಮಿತಾಗೆ ಫೋನಾಯಿಸಿದಾಗ ತಿಳಿದ ಮತ್ತೊಂದು ವಿಚಾರ. ಮನೆಯಲ್ಲಿ ನವಜಾತ ಶಿಶು ಇದ್ದರೇ ಆ ವರ್ಷ ಅವರಿಗೆ 'ಬೊಂಬೆ ಎಳ್ಳು' ಹಬ್ಬವಂತೆ. ತನ್ನ ಹಸುಗೂಸು 'ಸಾಗರಿಕಾ' ಜೊತೆ ಈ ವರ್ಷ ಅವಳ ಹಬ್ಬ!!

ಮದುವೆಯ ನಂತರ ಹೈದರಾಬಾದ್ ನಲ್ಲಿ ನೆಲೆಸಿರುವ ಈಗ ಬಹುತೇಕ ಹಬ್ಬಗಳನ್ನು ಅಲ್ಲಿನವರಂತೆಯೇ ಮಾಡುವ ನನ್ನ ನಾದಿನಿ ಹೇಳಿದ್ದು.... ಹಬ್ಬದ ಮೊದಲ ದಿನ ಸಂಜೆ ಅವರು ಸಣ್ಣ ಮಕ್ಕಳಿಗೆ ’ಭೋಗಿ ಪಳ್ಳು’ ಎರೆಯುವರೆಂದು! ಈ ಭೋಗಿ ಪಳ್ಳು ಅಂದ್ರೆ ನೆನಸಿದ ಕಡ್ಲೆಕಾಳು, ಕಬ್ಬಿನ ಚೂರು, ರೇಗಿ ಪಂಡ್ಲು(ಎಲ್ಚಿ ಹಣ್ಣು) ಮತ್ತು ತಾಮ್ರದ ನಾಣ್ಯಗಳ ಮಶ್ರಣ. (ನನ್ನ ಗೆಳತಿ ಅರ್ಚನಾ ಮೂಲತಃ ತೆಲುಗಿನವರೆ ಹಾಗಾಗಿ ಅವರು ಕಡಲೆಕಾಳು ಉಪಯೋಗಿಸಿದ್ದು). ಅಲ್ಲದೇ ಕೆಲವರ ಮನೆಯಲ್ಲಿ ’ಬೊಮ್ಮಲ ಕೊಲ್ಲುವು’ ಅಂದ್ರೆ ಗೊಂಬೆಗಳನ್ನು ಅಚ್ಚುಕಟ್ಟಾಗಿ ಜೋಡಿಸಿಡುತ್ತರಂತೆ.

ಆಂಧ್ರ ಪ್ರದೇಶದ ಇನ್ನು ಕೆಲವು ಕಡೆ ಅಕ್ಕಿ, ಮತಿತರೆ ಧಾನ್ಯದ ಮಿಶ್ರಣ ಜೊತೆಗೆ ಕಾಸು, ಹೂವಿನ ದಳ ಇವುಗಳನ್ನು ಮಕ್ಕಳ ಮೇಲೆ ಎರೆದು ಹರಸುತ್ತಾರೆ ಎಂಬ ವಿಚಾರ ಅಂತರ್ಜಾಲದಲ್ಲಿ ಸುತ್ತಾಡುವಾಗ ತಿಳಿಯಿತು.

ನನ್ನ ಗೆಳತಿ ಆರತಿ ಅವರು ಮಕ್ಕಳಿಗೆ ಎರೆಯಲು ಸುಂದರವಾಗಿ ಸಿದ್ಧಪಡಿಸಿರುವ ತಟ್ಟೆ ! ಇದರಲ್ಲಿಯೇ ಕಡಲೆಪುರಿ, ಕಬ್ಬಿಣ ಚೂರು, ಕಾಸು, ಸಿಹಿ ಮಿಠಾಯಿಗಳಿವೆ...
ಆಚರಣೆಯಲ್ಲಿ ಏನೇ ವೈವಿದ್ಯವಿದ್ದರೂ ಎಲ್ಲರ ಮೂಲ ಉದ್ದೇಶ ಒಂದೆ ಅಲ್ವಾ ನಮ್ಮ ಮಕ್ಕಳ ಒಳಿತಿಗಾಗಿ ಪ್ರಾರ್ಥಿಸೋದು :))

Wednesday, January 13, 2010

ಸಂಕ್ರಾಂತಿಯ ಸಂತಸ!!!

ಎಲ್ಲರಿಗೂ ಮಕರ ಸಂಕ್ರಾಂತಿ ಹಬ್ಬದ ಶುಭಾಶಯಗಳು !! ಕಳೆದ ವರ್ಷ ಬೆಂಗಳೂರಿನಲ್ಲಿ ಅಜ್ಜಿಯ ಮನೆಯಲ್ಲಿ ಎಲ್ಲರ ಜೊತೆಗೂಡಿ ಹಬ್ಬ ಮಾಡಿದ್ಲು ಪುಟ್ಟಿ. ಅವಳು ಮತ್ತು ಅವಳ ಸೋದರ ಮಾವನ ಮಗಳು 'ಖುಶಿ' ಗೆ ಸಂಜೆ ಎಳ್ಳು ಎರೆದು ಆರತಿ ಮಾಡಿದಾಗಿನ ಫೋಟೊಗಳಿವು:)


ಮಾವನ
ಮಗಳೆ ಖುಶಿ ಬಾರೆ
ಎಳ್ಳು ಬೆಲ್ಲ ಬೀರೋಣ ಬಾ
ಜರತಾರಿ ಲಂಗ ಕುಪ್ಪಸ ತೊಟ್ಟು ಬಾ
ರೇಷಿಮೆ ಲಂಗ ತೊಟ್ಟು ನಾ ಬರುವೆ
ಅಜ್ಜಿ ಕೊಟ್ಟ ಎಳ್ಳು ಬೆಲ್ಲವ
ಎಲ್ಲರ ಮನೆಗಳಿಗೆ ಬೀರೋಣ ಬಾ!!
(ತವಿಶ್ರೀ ಅವರು ಬರೆದ ಚೆಂದದ ಪದ್ಯವನ್ನು ಸ್ವಲ್ಪ ಮಾರ್ಪಡಿಸಿರುವೆ )


ಮಾಲಾ ರಾವ್ ಅವರು ನಂದಗೋಕುಲದಲ್ಲಿ ಪುಟ್ಟ ಅಮ್ಮುವಿಗೆ ಬರೆದ ಎಳ್ಳು ಎರೆಯುವ ಹಾಡು.


Thursday, December 24, 2009

ಕ್ರಿಸ್ ಮಸ್ ಪಾರ್ಟಿ !!!

ಎಲ್ಲರಂತೆ ನಮ್ಮ್ ಮನೆಯಲ್ಲೂ ಕ್ರಿಸ್ ಮಸ್ ಮರವನಿಟ್ಟು ಹಬ್ಬ ಆಚರಿಸಬೇಕು ಅಂತ ಆಸೆ ಇದ್ದ್ರೂ ನನ್ನ ಸೋಮಾರಿತನದಿಂದ ಅದನಿನ್ನೂ ಶುರು ಮಾಡಿಲ್ಲ.
ಕಳೆದ ವರ್ಷ ಅಪ್ಪನ ಸ್ಟಾಂಪ್ ಕ್ಲಬಿನಲ್ಲಿ ನಡೆದ ಕ್ರಿಸ್ ಮಸ್ ಪಾರ್ಟಿಯಲ್ಲಿ ಪುಟ್ಟಿ ಓಡಾಡಿದ್ದು ಹೀಗೆ...






ಈ ವರ್ಷ ಮಾಲ್ ನಲ್ಲಿ ನಿಲ್ಲಿಸಿದ್ದ ಕ್ರಿಸ್ ಮಸ್ ಮರದೆದುರು..