Showing posts with label ಪುಟ್ಟಿ ವಿಡಿಯೊ. Show all posts
Showing posts with label ಪುಟ್ಟಿ ವಿಡಿಯೊ. Show all posts

Sunday, January 08, 2012

”ಈ ಸಂಭಾಷಣೆ’ ಪುಟ್ಟಿ ಧ್ವನಿಯಲ್ಲಿ

ಮುಂದಿನ ಪಾರ್ಟಿಯಲ್ಲಿ ಒಂದೆರೆಡು ಹಾಡುಗಳನ್ನು ಹಾಡಲೇಬೇಕೆಂದು ’ಹೇಮಂತ್’ಗೆ  ಗೆಳೆಯರು ಒತ್ತಾಯ ಮಾಡಿದ್ದರು. ಕಾಲೇಜು ದಿನಗಳ ನಂತರ ಆಗಾಗ್ಗೆ ಗುನುಗುವುದು ಬಿಟ್ಟರೆ ಹಾಡೋದು ಪೂರ್ತಿಯಾಗಿ ನಿಲ್ಲಿಸಿದ್ದ ಇವರು, ಈ ಪಾರ್ಟಿಯ ಸಲುವಾಗಿ ಕೆಲವೊಂದು ಹಾಡುಗಳನ್ನು ದಿನವೂ ಹಾಡಿ ಪ್ರ್ಯಾಕ್ಟೀಸ್ ಮಾಡಲು ಶುರು ಮಾಡಿದ್ರು. ಅಪ್ಪನ ಹಾಡು ಕೇಳಿ, ಕೇಳಿ, ಪುಟ್ಟಿಯೂ ಅವುಗಳನ್ನು ಕಲಿತುಬಿಟ್ಟಳು.
"ಅಪ್ಪ ನಿನ್ನ ಹಾಡು ನಾನೂ ಹಾಡ್ತೀನಿ ಕೇಳು" ಅಂತ ಮೈಕ್ ಹಿಡಿದು ಹಾಡಿಯೇಬಿಟ್ಟಳು. ಯಾವಾಗ ಅಪ್ಪ ಹಾಡಬೇಕು, ಯಾವಾಗ ಅಮ್ಮ(ಹೆಣ್ಣು ಧ್ವನಿ) ಎಲ್ಲವೂ ಚಾಚೂ ತಪ್ಪದೆ ಹೇಳಿ ನಮ್ಮನ್ನು ಬೆರಗುಗೊಳಿಸಿದಳು:)) ಹಿನ್ನಲೆ ಸಂಗೀತದ ಜೊತೆ ಹಾಡುವುದು ಅವಳಿಗೆ ಹೊಸ ಆಟವಾಗಿದೆ. ಕಾರಣಾಂತರಗಳಿಂದಾಗಿ ಹೇಮಂತ್ ಪಾರ್ಟಿಯಲ್ಲಿ ಹಾಡಲಾಗಲಿಲ್ಲ. ಆದ್ರೆ ನನಗಂತೂ ಖುಷಿಯೋ ಖುಷಿ!! ನಾನು ಹೇಳಿ ಕೊಡದೇ ಪುಟ್ಟಿ ಅವಳಾಗಿಯೇ ಕನ್ನಡ ಹಾಡು ಕಲಿತಿದ್ದಾಳೆ, ಅದಕ್ಕಿಂತ ಹೆಮ್ಮೆಯುಂಟೆ :))
ಪುಟ್ಟಿಗೆ ಮಕ್ಕಳ ಪದ್ಯ/ ಹಾಡುಗಳನ್ನು ಹೇಳಿಕೊಡುವಾಗ ಅವಳ ಜೊತೆ ಹಾಡುವುದು ಬಿಟ್ಟರೆ ನಾನು ಹಾಡೊಲ್ಲ. ಹಾಡಲು ಬಾರದಿದ್ದರೂ ಇನ್ನ್ಮೇಲೆ ಅವಳಿಗಾಗಿ ಹಾಡಬೇಕು ಅಂತ ನಿರ್ಧರಿಸಿರುವೆ ;)
ಅವಳ ಹಾಡು ಕೇಳಿ....

Saturday, June 11, 2011

ಜಾರಬಂಡಿ ಆಟ !!

ಜಾರ ಬಂಡಿ ಆಟ
ಜಾರಿ ಬೀಳೊ ಆಟ
ಜಾರಿ ಬಿದ್ದ ರಾಮಣ್ಣ
ಹಲ್ಲು ಮುರಿದು ಚೂರಾಗಿ
ಕಣ್ಣಲ್ ಬಂತು ನೀರು
ಆಡುತ್ತಿದ್ದ ಮಕ್ಕಳು
ಅವನ ನಗಿಸಿ ನಕ್ಕರು
ಹ್ಹ ಹ್ಹ ಹ್ಹ ...

Saturday, June 04, 2011

ಮಳೆ ಮಳೆ ಮಲ್ಲಪ್ಪ !!


ಮಳೆ ಮಳೆ ಮಲ್ಲಪ್ಪ
ಕೈಯ ಚಾಚೋ ಕರಿಯಪ್ಪ
ಮಳೆ ಮಳೆ ಮಲ್ಲಪ್ಪ
ಕೈಯ ಚಾಚೋ ಕರಿಯಪ್ಪ
ತಿರುಗೊ ತಿರುಗೊ ತಿಮ್ಮಪ್ಪ
ತಿರುಗಲಾರೆ ಉಸ್ಸಪ್ಪ !!
ಮಳೆ ಬಂತು ಮಳೆ
ಕೊಡೆ ಹಿಡಿದು ನಡೆ
ಮಣ್ಣಿನಲ್ಲಿ ಜಾರಿ ಬಿದ್ದು
ಬಟ್ಟೆ ಎಲ್ಲಾ ಕೊಳೆ

ಬಿಸಿಲು ಬಂತು ಬಿಸಿಲು
ಕೋಟು ಟೋಪಿ ತೆಗೆ
ಬಾವಿಯಿಂದ ನೀರು ಸೇದಿ
ಸೋಪು ಹಾಕಿ ಒಗೆ

Sunday, May 22, 2011

ತೋಟಕೆ ಹೋಗೊ ತಿಮ್ಮ..

ತೋಟಕೆ ಹೋಗೊ ತಿಮ್ಮ
ತೋಳ ಬಂದೀತಮ್ಮ
ಹಸು ಮೇಯ್ಸೋ ತಿಮ್ಮ
ಹಸು ಹಾದೀತಮ್ಮ
ಒಲೆ ಉರಿಸೊ ತಿಮ್ಮ
ಉರಿ ಸುಟ್ಟೀತಮ್ಮ
ಪಾಠ ಬರೆಯೋ ತಿಮ್ಮ
ಬಳಪ ಇಲ್ಲ ಅಮ್ಮ

ಹೂವು ಬಿಡಿಸೊ ತಿಮ್ಮ
ಹಾವು ಕಚ್ಚೀತಮ್ಮ
ಕಾವಲಿ ತಾರೋ ತಿಮ್ಮ
ಕಾಲು ನೋವು ಅಮ್ಮ
ನೀರು ಸೇದೊ ತಿಮ್ಮ
ಕೈ ನೋವು ಅಮ್ಮ
ಊಟಕೆ ಬಾರೋ ತಿಮ್ಮ
ಓಡಿ ಬಂದೆ ಅಮ್ಮ

Thursday, May 12, 2011

ಕುಂಟೆ ಬಿಲ್ಲೆ

ಶಾಲೆಯಿಂದ ಬಂದ್ಮೇಲೆ ಆಡ್ತಾಯಿದ್ದ ಕುಂಟೆ ಬಿಲ್ಲೆ ಆಟ ನೆನಪಿದ್ಯಾ? ಚಪಟ್ಟೆಯಾದ ಕಲ್ಲನ್ನು "ಬಚ್ಚ"ಅಂತ ಇದ್ದದ್ದು.....ಕಡ್ಡಿ ಹಿಡಿದು ಮಣ್ಣಿನ ನೆಲದ ಮೇಲೆ  ಗೆರೆಗಳ ಬರೆಯೋದು.. ರೋಡಿಗೆ ಟಾರ್(ಡಾಂಬಾರು) ಹಾಕಿದ ಮೇಲೆ ಸೀಮೆಸುಣ್ಣ ಅಥವಾ ಇಟ್ಟಿಗೆ ಚೂರಿನಿಂದ ಬರೀತಾ ಇದ್ವಿ.. ಆಮೇಲೆ ”ಬಚ್ಚ’ಗೆ ಮುತ್ತು ಕೊಟ್ಟು, ದೇವರನ್ನು ನೆನದು ಬಚ್ಚ ಗೆರೆಗೆ ತಾಕದಿರಲಿ ಅಂತ ಅವನ ಬೇಡಿ ಕೊಂಡು ಎಸೆದು. ಪಾದ ಗೆರೆಗೆ ತಾಕದಂತೆ ಎಚ್ಚರ ವಹಿಸಿ ಎಲ್ಲಾ ಮನೆಗಳಿಗೆ ಕುಂಟುತ್ತ ಹೋಗಿ, ಹಿಂತಿರುಗಿ ಬರುವಾಗ ಮರೆಯದೇ ಬಚ್ಚವನ್ನು ಎತ್ತಿಕೊಂಡು ಬರೋದು. ಆಮೇಲೆ ಚಾಚಿದ ಅಂಗೈ ಮೇಲೆ ಬಚ್ಚ ಇಟ್ಟುಕೊಂಡು ಕುಂಟೋದು, ಕೈಯನ್ನು ಮುಷ್ಟಿ ಮಾಡಿ ಅದರ ಮೇಲೆ ಬಚ್ಚ ಇಟ್ಟುಕೊಂಡು ಕುಂಟೋದು, ಕಣ್ಣು ಮುಚ್ಚಿಕೊಂಡು ಮನೆಗಳಿಗೆ ನಡೆದು ಕೊಂಡು ಹೋಗುತ್ತಾ "Am I right" ಅಂತ ಕೇಳೋದು. ಆ ದಿನಗಳೇ ಚೆಂದ ಅಲ್ವಾ :))

ಇವೆಲ್ಲಾ ಈಗಿನ ಮಕ್ಕಳು ಆಡ್ತಾರಾ? ಅವರಿಗೆ ಹೇಳಿ ಕೊಡಲು ದೊಡ್ಡವರಿಗೆ ಪುರುಸೊತ್ತು ಇದ್ಯಾ?

ನಮ್ಮ್ ಪುಟ್ಟಿಗಂತು ಈಗ ಇದು ನೆಚ್ಚಿನ ಆಟ. ಅವಳ ಆಟಕ್ಕೆ ಯಾವುದೇ ರೂಲ್ಸ್ ಇಲ್ಲ. ಅವಳಿನ್ನೂ ಒಂದು ಕಾಲಿನಲ್ಲಿ ನೆಗೆಯುವುದು(ಕುಂಟೋದು) ಕಲಿತಿಲ್ಲ. ಸುಮ್ಮನೆ ಎಲ್ಲಾ ಮನೆಗಳಿಗೂ ಅಂಕಿಗಳ ಎಣಿಸುತ್ತಾ ನೆಗೆಯುತ್ತಾ ಹೋಗ್ತಾಳೆ. ನೆಗೆಯುವುದರ ಜೊತೆಗೆ ’ಒಂದು ಎರಡು’ ಎಣಿಕೆಯ ಹಾಡನ್ನು ಹೇಳುತ್ತಾ ನೆಗೆಯುವುದು ರೂಢಿ ಮಾಡಿರುವೆ. ಈಗವಳಿಗೆ ಈ ಹಾಡು ಬಾಯಿಪಾಠವಾಗಿದೆ.
ಒಂದು ಎರಡು ಬಾಳೆಲೆ ಹರಡು
ಮೂರು ನಾಲ್ಕು ಅನ್ನ ಹಾಕು
ಐದು ಆರು ಬೇಳೆ ಸಾರು
ಏಳು ಎಂಟು ಪಲ್ಯಕೆ ದಂಟು
ಒಂಬತ್ತು ಹತ್ತು ಎಲೆ ಮುದಿರೆತ್ತು
ಒಂದರಿಂದ ಹತ್ತು ಹೀಗಿತ್ತು 
ಊಟದ ಆಟವು ಮುಗಿದಿತ್ತು !!
ಅಲ್ಲದೆ ಈ ಮನೆಗಳಲ್ಲಿ ಅಂಕಿಗಳನ್ನು ಕನ್ನಡದಲ್ಲಿ ಬರೆದು, ’ಒಂದನೆ’ ಮನೆಗೆ ಹೋಗಿ ನಿಲ್ಲು ಅಥ್ವಾ ’ನಾಲ್ಕನೆ’ ಮನೆಗೆ ಹೋಗು ಎಂದು ಹೇಳುತ್ತಾ ಆಟವಾಡುತ್ತಾ ಸುಲಭವಾಗಿ ಅಂಕಿಗಳನ್ನೂ ಕಲೀಬಹುದು:)
ಅಂಕಿಗಳ ಮತ್ತೊಂದು ಹಾಡು:

ಒಂದು ಎರಡು ತಿಂಡಿ ತಿನ್ನಕ್ ಹೊರಡು
ಮೂರು ನಾಲ್ಕು ನಾಲ್ಕೇ ದೋಸೆ ಸಾಕು
ಐದು ಆರು ಬಿಸಿ ಕಾಫಿ ಹೀರು
ಏಳು ಎಂಟು ಸ್ಕೂಲಿಗೆ ರಜ ಉಂಟು
ಒಂಬತ್ತು ಹತ್ತು ಬಂತು ಆಟದ ಹೊತ್ತು!!


ಒಂದು ಎರಡು ಬೇಸನ್ ಲಾಡು
ಮೂರು ನಾಲ್ಕು ಮೈಸೂರ್ ಪಾಕು
ಐದು ಆರು ಶ್ಯಾವಿಗೆ ಖೀರು(ಬಾದಾಮಿ ಖೀರು)
ಏಳು ಎಂಟು ಪೆಪ್ಪರ್‍ಮಿಂಟು(ಮಿಠಾಯಿ ಗಂಟು)
ಒಂಬತ್ತು ಹತ್ತು ಕೇಸರಿ ಬಾತು( ಗರಂ ಗರಂ ಬಿಸ್ಕತ್ತು) !!

Monday, April 18, 2011

ಶ್ರೀ ಮಹಾತ್ಮ ಗಾಂಧಿ !

ಬಲಗೈಯಲ್ಲಿ ಗೀತೆ
ಎಡಗೈಯಲ್ಲಿ ರಾಠೆ
ಹಿಡಿದವರ್ಯಾರು ಗೊತ್ತೆ
ಅವರೆ ನಮ್ಮ ಗಾಂಧಿ
ಶ್ರೀ ಮಹಾತ್ಮ ಗಾಂಧಿ

ಮಕ್ಕಳಿಗೆಲ್ಲಾ ತಾತ
ವಿಶ್ವಕ್ಕೆಲ್ಲ ಧಾತ
ಅಂತಹವರ್ಯಾರು ಗೊತ್ತೆ
ಅವರೆ ನಮ್ಮ ಗಾಂಧಿ
ಶ್ರೀ ಮಹಾತ್ಮ ಗಾಂಧಿ

ಕೈಯಲ್ಲೊಂದು ಕೋಲು
ಅವರಿಗಿಲ್ಲಾ ಸೋಲು
ಅಂತಹವರ್ಯಾರು ಗೊತ್ತೆ
ಅವರೆ ನಮ್ಮ ಗಾಂಧಿ
ಶ್ರೀ ಮಹಾತ್ಮ ಗಾಂಧಿ

ಇನ್ನೊಂದು ವಿಡಿಯೋ ಇಲ್ಲಿದೆ

Sunday, April 10, 2011

ಬೇಟೆಗಾರ !!



ಬೇಟೆಗಾರ ಬಂದ
ಬಿಲ್ಲು ಬಾಣ ತಂದ
ಕಾಡು ಹಂದಿ ಕೊಂದ
ಬೆಂದ ಹಂದಿ ತಿಂದ
ಹೊಟ್ಟೆ ನೋವು ಅಂದ
ಮರದ ಕೆಳಗೆ ಬಿದ್ದ
ಹುಲಿರಾಯ ಬಂದ
ಹೊಟ್ಟೆ ತುಂಬ  ತಿಂದ
ಹುಲಿರಾಯ ಬಂದ
ಹೊಟ್ಟೆ ತುಂಬ ತಿಂದ 

Thursday, April 07, 2011

ದಿನಚರಿ

ದಿನಚರಿ
ದಿನವು ಬೇಗ ಏಳಬೇಕು
ಎದ್ದು ಹಲ್ಲನುಜ್ಜಬೇಕು
ಉಜ್ಜಿ ಮುಖವ ತೊಳೆಯಬೇಕು
ದಿನವು ಸ್ನಾನ ಮಾಡ ಬೇಕು

ದೇವರಿಗೆ ನಮಸ್ಕರಿಸಿ
ತಿಂಡಿಯನ್ನು ತಿನ್ನಬೇಕು
ಗುರುವಿಗೆ ನಮಸ್ಕರಿಸಿ
ಶಾಲೆಯಲ್ಲಿ ಕಲಿಯಬೇಕು

Tuesday, December 14, 2010

ಮುದ್ದೆ ಮಾಡೋದು ಹೀಗೆ ...

ನನಗೆ ಮುದ್ದೆ ಮಾಡೋಕೆ ಬರೋಲ್ಲ. ಅದು ಅಷ್ಟಾಗಿ ಇಷ್ಟನೂ ಇಲ್ಲ. ರಾಗಿ ರೊಟ್ಟಿ ಇಷ್ಟ ಅದನ್ನ ತಪ್ಪದೇ ವಾರಕ್ಕೆ ಒಂದೆರೆಡು ಸರ್ತಿ ಮಾಡ್ತೀನಿ. ಪುಟ್ಟಿಗೂ ಬಲು ಇಷ್ಟ. ಪುಟ್ಟಿ ಅಜ್ಜ್ಜಿಇಲ್ಲಿ ಇದ್ದಾಗ ಅವರು ಆಗಾಗ್ಗೆ ಮುದ್ದೆ ಮಾಡುತ್ತಿದ್ದರು. ಆಗೆಲ್ಲಾ ಪುಟ್ಟಿ ಅವರ ಪಕ್ಕದಲ್ಲೇ ಕುಳಿತಿದ್ದು, ಅವರು ಮುದ್ದೆ ತಿರುವುದನ್ನೇ ನೋಡುತ್ತಾ ಕೊನೆಯಲ್ಲಿ ತಾನೂ ಒಂದೆರೆಡು ತುತ್ತು ಬಿಸಿ ಬಿಸಿ ಮುದ್ದೆ ತುಪ್ಪದಲ್ಲಿ ಹಾಕಿ ಗುಳುಮ್ ಮಾಡುತ್ತಿದ್ದಳು. 
ಈಗ ಮುದ್ದೆ ಮಾಡುವ ಕೋಲಿಗೆ ಕೆಲಸವಿಲ್ಲ. ಆಗಾಗ್ಗೆ ಕಣ್ಣಿಗೆ ಕಾಣಿಸಿದಾಗ ಅದನ್ನ ಹಿಡಿದು ಪುಟ್ಟಿ ಮುದ್ದೆ ಮಾಡೋದು ಹೀಗೆ... 


Friday, November 12, 2010

ಪುಟ್ಟಿಯ ಮೊದಲ ಸ್ಟೇಜ್ ಶೋ !!

ಪುಟ್ಟಿಗೆ ಡ್ಯಾನ್ಸ್ ಬಹಳ ಇಷ್ಟ! ಯಾವ ಮಗುವಿಗೆ ಇಷ್ಟವಿಲ್ಲ ಅಲ್ವಾ :) ನಮ್ಮೂರಿನ ಭಾರತೀಯ ಅಸೋಸಿಯೇಷನ್ ಅವರ ವಾರ್ಷಿಕೋತ್ಸವ 'Glimpses of India' ಕಾರ್ಯಕ್ರಮದಲ್ಲಿ ಈ ಸರ್ತಿ ಪುಟ್ಟಿ ಮತ್ತವಳ ಸ್ನೇಹಿತರದ್ದೂ ಒಂದು ಡ್ಯಾನ್ಸ್ ಇತ್ತು. ಪ್ರಾಕ್ಟೀಸ್ ಮಾಡುವಾಗಲಿಂದನೂ ಬಹಳ ಉತ್ಸಾಹದಿಂದಲೇ ಅದರಲ್ಲಿ ಭಾಗವಹಿಸಿದಳು. ಇದು ಅವಳ ಮೊದಲ ’ಸ್ಟೇಜ್ ಶೋ’ !! ಹಿಂದಿ ಚಲನಚಿತ್ರ ’ಹೋಮ್ ಡೆಲಿವೆರಿ’ ಯಲ್ಲಿರುವ ’ಹ್ಯಾಪಿ ದಿವಾಲಿ’ ಅನ್ನೋ ಹಾಡಿಗೆ :) ದೀಪಾವಳಿ ಹಬ್ಬವೂ ಅದೇ ಸಮಯದಲ್ಲಿ ಬಂದಿದ್ದರಿಂದ ಇದು ಎಲ್ಲರಿಗೂ ಮೆಚ್ಚುಗೆ ಆಯಿತು.

ವಿಡಿಯೋ ರೆಕಾರ್ಡ್ ಮಾಡಿ ಕೊಟ್ಟ ಶಿಶಿರ್ ಅಪ್ಪ ಮತ್ತು ಅರ್ಜುನ್ ಅಂಕಲ್ ಗೆ ತುಂಬಾ ತುಂಬಾ ಥ್ಯಾಂಕ್ಸ್ !!

Wednesday, November 10, 2010

ದೀಪಾವಳಿ ಪುಸ್ತಕ !!

ಇತ್ತೀಚೆಗೆ ನಾವು ಲೈಬ್ರರಿಗೆ ಹೋದಾಗಲೆಲ್ಲ ಪುಟ್ಟಿ ತನಗೆ ಬೇಕಾದ ಪುಸ್ತಕಗಳನ್ನು ಆರಿಸಿ ತರ್ತಾಳೆ. ನಾನು ಮೊದಲೇ ಲೈಬ್ರರಿಯ ವೆಬ್ಸೈಟಿನಲ್ಲಿ ಹುಡುಕಿ ಬೇಕಾದ ಪುಸ್ತಕವನ್ನು ಕಾದಿರಿಸಿಕೊಳ್ಳುವೆ.  ಪುಟ್ಟಿಗೆ ಅವರ ಸ್ಕೂಲಿನಲ್ಲಿ ವಾರಕ್ಕೊಂದು ’ಥೀಮ್’ ಇರುತ್ತೆ. ನಾನು ಅವಳಿಗೆ ಆ ಥೀಮಿನ ಅನುಗುಣವಾಗಿ ಪುಸ್ತಕಗಳನ್ನು ತರ್ತೀನಿ. ಮೊನ್ನೆ ಹ್ಯಾಲೋವೀನ್ ಟೈಮಿನಲ್ಲಿ ಓದಿದ್ದೆಲ್ಲಾ ಅದೇ ಪುಸ್ತಕಗಳೇ!
ಸರಿ ದೀಪಾವಳಿ ಬಂತಲ್ಲ ಅದರ ಬಗ್ಗೆ ಪುಸ್ತಕಗಳೇನಾದ್ರು ಇದೆಯಾ ಅಂತ ಹುಡುಕಿದೆ ಲೈಬ್ರರಿಯಲ್ಲಿ ಹಲವು ಪುಸ್ತಕಗಳು ಸಿಕ್ಕವು. ಅದರಲ್ಲಿ ಮಕ್ಕಳಿಗೆ ಅಂತ ಇದ್ದದ್ದು ಇದು "Lighting a Lamp: A Diwali Story (Festival Time)". ತಕ್ಷಣವೇ ಕಾದಿರಿಸಿದೆ. ಈ ಪುಸ್ತಕ ಮನೆಗೆ ತಂದಾಗಿನಿಂದ ಪುಟ್ಟಿ ಇದನ್ನು ದಿನಕ್ಕೆ ಒಂದು ಸಲವಾದ್ರೂ ತಿರುವಾಕಿದ್ದಾಳೆ.

ಅವಳು ಪುಸ್ತಕ ನೋಡುತ್ತಿರುವ ಒಂದು ವಿಡಿಯೋ...


ಇದಲ್ಲದೆ ಯೂಟ್ಯೂಬಿನಲ್ಲಿರುವ ಈ ಎರಡು ವಿಡಿಯೋ ಕೂಡ ಪುಟ್ಟಿಗೆ ಬಲು ಇಷ್ಟ.

Monday, October 25, 2010

ಮಲ್ಟಿ ಕಲ್ಚರ್ ಡೇ!!

ಪುಟ್ಟಿ ಶಾಲೆಯಲ್ಲಿ ನಿನ್ನೆ ಭಾನುವಾರ ’ಮಲ್ಟಿ ಕಲ್ಚರ್ ಡೇ’ ಆಚರಿಸಿದರು. ಎಲ್ಲರೂ ಅವರವರ ದೇಶದ ಉಡುಗೆ ತೊಟ್ಟು ಹೋಗಬೇಕಿತ್ತು. ಪುಟ್ಟಿ ಎಂದಿನಂತೆ ಉತ್ಸಾಹದಿಂದ ಸಿಂಗರಿಸಿಕೊಂಡು ಹೊರಟಳು. ಅಲ್ಲಿ ಎಲ್ಲಾ ಮಕ್ಕಳಿಂದ ಒಂದು ಸಣ್ಣ ಕಾರ್ಯಕ್ರಮವೂ ಇತ್ತು. ಅದರ ವಿಡಿಯೋ ತುಣುಕು.....

ನಮ್ಮ ತ್ರಿರಂಗ..
ನೆಚ್ಚಿನ ಐರೀನ್ ಜೊತೆಯಲ್ಲಿ...

ಇದಾದ ನಂತರ ಎಲ್ಲರ ಜೊತೆಗೂಡಿ ಊಟ ಮಾಡುವ ಕಾರ್ಯಕ್ರಮ. ಎಲ್ಲರೂ ಅವರವರ ದೇಶದ ಒಂದು ಅಡಿಗೆಯನ್ನು ತಂದಿದ್ದರು. ಇದೊಂದು ತರಹ ವಿಶೇಷ ಅನುಭವ!!
ನಮ್ಮ ಶ್ಯಾವಿಗೆ ಪಾಯಸ...

Thursday, October 14, 2010

ಸಂಪಿಗೆ ಮರದ ಹಸಿರೆಲೆ ನಡುವೆ ..





ಚಲನಚಿತ್ರ: ಉಪಾಸನೆ (1974)
ಸಾಹಿತ್ಯ : ಆರ್.ಎನ್. ಜಯಗೋಪಾಲ್
ಸಂಗೀತ : ವಿಜಯಭಾಸ್ಕರ್
ಗಾಯನ : 
ಬಿ.ಕೆ. ಸುಮಿತ್ರ
ಸಂಪಿಗೆ ಮರದ ಹಸಿರೆಲೆ ನಡುವೆ ಕೋಗಿಲೆ ಹಾಡಿತ್ತು
ಚಿಕ್ಕವ್ವ....ಚಿಕ್ಕವ್ವ.....ಎನ್ನುತ ತನ್ನಾ ಗೆಳೆಯರ ಕರೆದಿತ್ತು
ಅದ ಕೇಳಿ ನಾ ಮೈ ಮರೆತೆ ಸ್ವರವೊಂದು ಆಗಲೆ ಕಲಿತೆ
ಹಾಡಿದೆ ಈ ಕವಿತೆ ನಾ ಹಾಡಿದೆ ಈ ಕವಿತೆ
ದೂರದ ಗುಡಿಯಲಿ ಪೂಜೆಯ ವೇಳೆಗೆ ಘಂಟೆಯು ಮೊಳಗಿತ್ತು
ಟಣ್ ಡಣ್ ಟಣ್ ಡಣ್......
ಎನ್ನುತ ಸೇವೆಗೆ ಎಲ್ಲರ ಕರೆದಿತ್ತು
ಅದಕೇಳಿ ನಾ ಮೈಮರೆತೆ ಸ್ವರವೊಂದು ಆಗಲೆ ಕಲಿತೆ
ಹಾಡಿದೆ ಈ ಕವಿತೆ ನಾ ಹಾಡಿದೆ ಈ ಕವಿತೆ
ಹರಿಯುವ ನದಿಯಾ ನೋಡುತ ನಿಂತೆ ಅಲೆಗಳು ಕುಣಿದಿತ್ತು
ಕಲ ಕಲ ಕಲ ಕಲ......
ಮಂಜುಳ ನಾದವು ಕಿವಿಗಳ ತುಂಬಿತ್ತು
ಅದಕೇಳಿ ನಾ ಮೈ ಮರೆತೆ ಸ್ವರವೊಂದು ಆಗಲೆ ಕಲಿತೆ
ಹಾಡಿದೆ ಈ ಕವಿತೆ ನಾ ಹಾಡಿದೆ ಈ ಕವಿತೆ



Monday, September 27, 2010

ಕಣ್ಣಾ ಮುಚ್ಚೆ ಕಾಡೆ ಗೂಡೆ...

ಕಣ್ಣಾ ಮುಚ್ಚೆ ಕಾಡೆ ಗೂಡೆ
ಉದ್ದಿನ ಮೂಟೆ ಉರುಳಿ ಹೋಯ್ತು
ನಿಮ್ಮಯ ಹಕ್ಕಿ ಬಚ್ಚಿಟ್ಟ್ ಕೊಳ್ಳಿ
ನಮ್ಮಯ ಹಕ್ಕಿ ಬಿಟ್ಟೇ ಬಿಟ್ಟೇ!



ಈ ಹಾಡಿನ ಬಗ್ಗೆ ಹಿಂದೆ ನನ್ನ ಬ್ಲಾಗಿನಲ್ಲಿ ಬರೆದಿದ್ದೆ...

Wednesday, July 21, 2010

ಹ್ಯಾಪಿ ಬರ್ತ್ ಡೇ ರತ್ನ ಅಜ್ಜಿ!!!

ಇವತ್ತು ನನ್ನ ಅಮ್ಮ ಅಂದ್ರೆ ಪುಟ್ಟಿಯ ಅಜ್ಜಿಯ ಹುಟ್ಟುಹಬ್ಬ. ಅಜ್ಜಿಗೆ ಪುಟ್ಟಿ ಹ್ಯಾಪಿ ಬರ್ತ್ ಡೇ ಹೇಳಿದ್ದು ಹೀಗೆ....


ಬರ್ತ್ ಡೇ ಅಂದ ಕೂಡಲೆ ತಲೆಗೆ ಪಾರ್ಟಿ ಟೋಪಿ ಹಾಕಿಕೊಳ್ತಾಳೆ:)


Tuesday, July 13, 2010

ಬರೆಯೋ ಹಾದಿಯಲ್ಲಿ ಪುಟ್ಟಿಯ ಮೊದಲ ಕೆಲವು ಹೆಜ್ಜೆ!

ಪುಟ್ಟಿ ABC ಹಾಡು ಹೇಳೋಕೆ ಶುರು ಮಾಡಿ ಬಹಳ ದಿನಗಳೇ ಆಗಿದೆ. ಆದ್ರೆ ಎಲ್ಲಾ ಅಕ್ಷರಗಳನ್ನ ಗುರುತಿಸೋದು ಬರುತ್ತಿರಲಿಲ್ಲ, ಆದ್ರೆ ಆಗ್ಲೇ A,B,D ಬರಿಯೋಕೆ ಶುರು ಮಾಡಿದ್ಲು. ವಾರಕ್ಕೊಂದು ಅಕ್ಷರ ಹೇಳಿ ಕೊಡಿ, ಜೊತೆಗೆ ಆ ವಾರವಿಡೀ ಒಂದೇ ಅಕ್ಷರದ ಕಲರಿಂಗ್ ಮಾಡಿಸಿ ಅನ್ನೋ ಸಲಹೆ ಗೆಳತಿ ಶುಭಾ (ಶಕ್ತಿ ಅಮ್ಮ) ಕೊಟ್ಟ್ರು.
ಅಂತರ್ಜಾಲದಲ್ಲಿ ಅಕ್ಷರಗಳ ಕಲರಿಂಗ್ ಪೇಜ್ಸ್ ಹುಡುಕುತ್ತಾ “Letter of the week” ಅನ್ನೋ ಈ ತಾಣದ ಪರಿಚಯವಾಯ್ತು. ಅಲ್ಲಿನ ಆಟ ಜೊತೆಗೆ ಪಾಠ ತುಂಬಾ ಇಷ್ಟವಾಯ್ತು. ಅದರಲ್ಲಿದ್ದ ಹಾಗೆ ಎಲ್ಲಾ ಅಲ್ಲದಿದ್ದರೂ ಅಲ್ಪ ಸ್ವಲ್ಪ ಮಾಡಲು ಶುರು ಮಾಡಿದೆ. ಜೊತೆಗೆ starfall.com ನಲ್ಲಿರುವ ಅಕ್ಷರ ನೋಡ್ತಾ ಹೋದ್ವಿ, ಆದ್ರೆ ಪುಟ್ಟಿ ಬರಿ A ನೋಡಿ ಸುಮ್ಮನಾಗುತ್ತಿರಲಿಲ್ಲ ದಿನಕ್ಕೆ ನಾಲ್ಕೈದು ಅಕ್ಷರ ನೋಡುತ್ತಿದ್ದಳು. ಅವಳು ಪೈಂಟ್ ಮಾಡಿದ/ ತಿದ್ದಿದ ಕೆಲವು A ಗಳು.

ಹೀಗೆ ಒಂದು ವಾರವಿಡೀ A ಜಪ ನೋಡಿ, ಕೇಳಿ ಪುಟ್ಟಿಗೆ ಬೋರ್ ಆಯ್ತೋ ಏನೋ. ಎರಡನೆ ವಾರ ಅವಳಾಗಿಯೇ ತನ್ನ alphabet floor mat ನಲ್ಲಿರೋ ಅಕ್ಷರಗಳನ್ನು ಗುರುತಿಸುತ್ತಾ ಹೋದ್ಲು, ಅಲ್ಲದೆ ಎಲ್ಲದರ phonic sound ಕೂಡ ಹೇಳೋಕೆ ಶುರು ಮಾಡಿದ್ಲು. ಈಗವಳು Capital ಮತ್ತು Lowercase letters ಎರಡನ್ನೂ ಗುರುತಿಸಿತ್ತಾಳೆ. ಆದ್ರೆ b, d, p ಮತ್ತು q ಇವುಗಳು ಕೆಲವೊಮ್ಮೆ ತಪ್ಪಾಗುತ್ತವೆ. ಅಲ್ಲಿಗೆ ನಮ್ಮ ವಾರಕ್ಕೊಂದು ಅಕ್ಷರ ಕಾರ್ಯಕ್ರಮ ಮುಗಿದೇ ಹೋಯ್ತು. ಜೊತೆಗೆ ಅಜ್ಜಿ ತಾತ ಇಲ್ಲಿದ್ದರಿಂದ ಪುಟ್ಟಿ ಅವರೊಡನೆ ಅಲ್ಲಿ ಇಲ್ಲಿ ಊರು ಸುತ್ತುವುದು ಹೆಚ್ಚಾಯ್ತು. ಆದ್ರೆ ಎಲ್ಲಿ ಹೋದ್ರು ಅಲ್ಲಿ ಅಕ್ಷರಗಳನ್ನ ಗುರುತಿಸೋದು ಹೊಸ ಆಟವಾಯ್ತು. ಅಂಗಡಿಯಲ್ಲೂ ಅದೇ ಆಟ, ತನ್ನ ಪುಸ್ತಕಗಳಲ್ಲೂ ಅದೇ ಹುಡುಕಾಟ. ಇವುಗಳೆಲ್ಲದರ ಜೊತೆಗೆ ಬರಿಯೊದು ಕೂಡ ಜಾಸ್ತಿ ಆಯ್ತು. ದಿನೆ ದಿನೆ ಅವಳ ಬರವಣಿಗೆ ಹೆಚ್ಚುತ್ತಿದೆ. ತನ್ನ ನೆಚ್ಚಿನ chalkboard ಮೇಲೆ ಅಕ್ಷರಗಳನ್ನ ಬರಿಯುತ್ತಿರುವ ಪುಟ್ಟಿ.

Monday, April 12, 2010

ಒಂದೂರಲ್ಲಿ...

ಪುಟ್ಟಿಗೆ ಈಗ ಕಥೆ ಹೇಳೋಕೆ ಅಮ್ಮ ಅಪ್ಪನ ಜೊತೆ ಅಜ್ಜಿ ತಾತಾ ಕೂಡ ಇದ್ದಾರೆ. ದಿನ ನಿತ್ಯ ತನಗೆ ಯಾವ ಕಥೆ ಬೇಕು ಅಂತ ಡಿಸೈಡ್ ಮಾಡೊದು ಪುಟ್ಟಿನೇ. ಹೀಗೆ ದಿನಕ್ಕೆ ನಾಲ್ಕಾರು ಕಥೆ ಕೇಳಿ ಕೇಳಿ, ಇತ್ತೀಚೆಗೆ ತಾನೇ ಕಥೆ ಹೇಳೋಕೆ ಶುರು ಮಾಡಿದ್ದಾಳೆ. ಅವಳು ಕಥೆ ಹೇಳೋಕೆ ಶುರು ಮಾಡಿ ೨ ವಾರಗಳೇ ಆಯ್ತಾದ್ರೂ ವಿಡಿಯೋ ತೆಗೆಯಲು ಆಗಿರಲಿಲ್ಲ, ನಿನ್ನೆ ಕೊನೆಗೂ ಸ್ವಲ್ಪ ರೆಕಾರ್ಡ್ ಮಾಡಿರುವೆ.
ಬನ್ನಿ ಕಥೆ ಹೇಳುವ ಕಥೆ ಕೇಳೋಣ :)

ಒಂದೂರಲ್ಲಿ....


Sunday, December 13, 2009

ಚಟ್ನಿ ಮಾಡೋದು ಹೀಗೆ

ಪುಟ್ಟಿ ಈಗ ಎಲ್ಲ ಕೆಲಸ ಮಾಡಬೇಕು ಅನ್ನೋ ಆಸೆ. ಅಡುಗೆ ಮಾದಲು ಹೋದ್ರೆ ತರಕಾರಿ ಹೆಚ್ತೀನಿ ಅಂತಾಳೆ. ಚಪಾತಿ ಹಿಟ್ಟನ್ನ ಉಂಡೆ ಮಾಡಿ ತಾನೂ ಲಟ್ಟಿಸಿ ಬೇಯಿಸಲು ಬರ್ತಾಳೆ. ನಾನು ಸ್ಟವ್ ಮುಂದೆ ಕೆಲಸ ಮಾಡೊವಾಗ ಅವಳಿಗೂ ಒಂದು ಪಾತ್ರೆ ಕೊಟ್ಟು ಅದಕ್ಕೆ ಈರುಳ್ಳಿ ಎಣಿಸಿ ತುಂಬು ಅಂತ ಹೇಳಿ ಕೆಳಗೆ ಕೂರಿಸ್ತೀನಿ. ತನಗೂ ಕೆಲ್ಸ ಇದೆ ಅಂತ ಖುಶಿಯಾಗಿ ಅವಳು ಕೆಲ್ಸ ಮಾಡೋಷ್ಟರಲ್ಲಿ ನನ್ನ ಅಡುಗೆ ಮುಗಿಯಬೇಕು:)
ಕೆಲವೊಮ್ಮೆ ಈ ಟ್ರಿಕ್ ನೆಡೆಯೊಲ್ಲ. ಅವಳೂ ಕೌಂಟರ್ ಮೇಲೆ ಕುಳಿತು ಅಮ್ಮ ಮಾಡೊದನ್ನ ನೋಡಬೇಕು ಅಂತಾಳೆ. ಹಾಗೆ ನೋಡಿ ಕಲಿತಿರುವುದರ ಪ್ರಭಾವಯಿದು...

Thursday, September 03, 2009

ಜೂ.. ಜೂ ...ಆಗಟ್

ಪುಟ್ಟಿಗೆ ಏನೇ ಹೊಸ ವಿಚಾರ ತೋರ್ಸಿದ್ರೂ / ಹೇಳಿಕೊಟ್ಟರೂ ಬಲು ಬೇಗ ಕಲಿತಾಳೆ. ಮಕ್ಕಳೇ ಹಾಗೆ ಅಲ್ವಾ, ಸ್ಪಂಜಿನಂತೆ ಎಲ್ಲವನ್ನೂ ತಮ್ಮೊಳಗೆ ಹೀರಿಕೊಳ್ತಾರೆ:-)
ಈಗ ಬೆಳಗ್ಗಿನ ನಿದ್ದೆಯನ್ನು ಬಿಟ್ಟು ಕೇವಲ ಮದ್ಯಾಹ್ನ ಮಾತ್ರ ೧ ಘಂಟೆ ಮಲಗೋ ಪುಟ್ಟಿಯನ್ನ ಇಡೀ ದಿನ ಬಿಜಿಯಾಗಿ ಬೋರ್ ಆಗದಂತೆ ನೋಡಿಕೊಳ್ಳೊದು ನನ್ನ ಕೆಲ್ಸ! ರೈಮ್ಸ್, ಪ್ರಾಣಿಗಳ ವಿಡಿಯೋ ಹೊರತಾಗಿ ಟಿವಿಯಂತೂ ನೋಡೊದೇ ಇಲ್ಲ. ಸರಿ, ಉಳಿದಂತೆ ಅದೂ ಇದೂ ಹೇಳ್ಕೊಡ್ತಾಯಿರ್ತೀನಿ. ಪುಟ್ಟಿಗೆ ಒಮ್ಮೆ ಹೇಳ್ಕೊಟ್ಟ್ರೆ ಮತ್ತೆ ಮತ್ತೆ ಅದನ್ನೇ ಕೇಳ್ತಾಳೆ. ಅವಳು ಈಗ ದಿನಗಳ, ಮಾಸಗಳ ಮತ್ತು ಗ್ರಹಗಳ ಇಂಗ್ಲಿಷ್ ಹೆಸ್ರು ಹೇಳ್ತಾಳೆ. ಅಲ್ಲದೇ ಒಂದರಿಂದ ಹತ್ತರವರೆಗೆ ಅಂಕಿ, ಹಲವು ರೈಮ್ಸ್/ ಹಾಡು ಎಲ್ಲಾ ಗೊತ್ತು ಪುಟ್ಟಿಗೆ.


ಇನ್ನು ಬರಿಯೋ ವಿಚಾರಕ್ಕೆ ಬಂದ್ರೆ ಅದು ಪುಟ್ಟಿಗೆ ಬಲು ಇಷ್ಟದ ಕೆಲ್ಸ! ಇತ್ತೀಚೆಗೆ ಅವಳ ಗೀಚುವಿಕೆ ನೇರ ಗೆರೆ ಅಥವಾ ಸೊನ್ನೆ ಸುತ್ತೋ ರೀತಿ ಕಾಣಿಸುತ್ತಿದೆ. ಅವಳು ಬರಿಯುವಾಗ ಗೆರೆ ಎಳೆದಾಗ ಒನ್/ ಒಂದು ಅಂತಲೂ .. ಸೊನ್ನೆ ಸುತ್ತಿದಾಗ ಸೊನ್ನೆ/ಜೀರೊ ಅಂತಲೂ ಹೇಳಿದ್ದಾಗಿದೆ, ಅದೀಗ ಅವಳಿಗೆ ಕರತಲಾಮಲಕ. ಕೇಳಿದಾಗ ಒನ್ ಅಥವಾ ಜೀರೋ ಬರೆದು ತೋರಿಸ್ತಾಳೆ! ಸದ್ಯದಲ್ಲೇ ಅವಲಿಗೆ ’ಅಕ್ಷರಾಭ್ಯಾಸ’ ಮಾಡಿಸೋಣವೆಂದಿದ್ದೇವೆ:)

ನಮ್ಮ್ ಪುಟ್ಟಿನ ಈಗ ಪಾಪ/ಬೇಬಿ ಅನ್ನುವಂತಿಲ್ಲ! ಹಾಗೇನಾದ್ರೂ ಅಂದ್ರೆ ತನ್ನ ಬಳಿಯಿರುವ ಗೊಂಬೆಗಳನ್ನ ತೋರಿಸಿ ಅದನ್ನ ’ಪಾಪ’ ಅಂತ ಕರಿತಾಳೆ:) ಎಷ್ಟ್ ಬೇಗ ಬೆಳ್ದ್ ಬಿಟ್ಟ್ಲು ಅನ್ನ್ಸುತ್ತೆ, ಈ ರೀತಿ ಅವ್ಳು ಹೇಳಲು ನಾವೂ ಕಾರಣ. ಅವಳಿಗೆ potty ಟ್ರೈನಿಂಗ್ ಶುರು ಮಾಡಿದಾಗಿಂದ ’ನೀನೀಗ big girl, ಡೈಪರ್ಸ್ ಬೇಬಿ ಮಾತ್ರ ಹಾಕೋದು, ನೀನು ಟಾಯ್ಲೆಟಿನಲ್ಲಿ pee, poo ಮಾಡ್ಬೇಕು’ ಅಂತೆಲ್ಲಾ ಹೇಳ್ತಾಯಿದ್ದೀವಿ.
ಏನೋ ಅಂತೂ ಪುಟ್ಟಿ ಈಗ ಹಗಲು ದೈಪರ್ಸ್ ಗೆ ’ಟಾ ಟಾ’ ಹೇಳಿದ್ದಾಳೆ. ಸುಮಾರು ೧೩ ತಿಂಗಳಿಗೇ ಡೈಪರ್ ಭಾರವೆನಿಸಿದಾಗ ಅಮ್ಮ ’ಐವಿ(heavy)' ಅಂತ ಹೇಳೋಕೆ ಶುರುಮಾಡಿದ್ಲು. ಈಗ ಸ್ವಲ್ಪ ದಿನದಿಂದ ಮನೆಯಲ್ಲಿ ಮಾತ್ರ ಅಮ್ಮನಿಗೆ ಹೇಳ್ತಾಯಿದ್ದವಳು ಈಗ ಒಂದು ವಾರದಿಂದ ಹೊರಗೆ ಅಂಗಡಿ/ ಪಾರ್ಕಿಗೆ ಹೋದ್ರೂ ಹೇಳಿ ಅಲ್ಲಿ ರೆಸ್ಟ್ ರೂಮಿನಲ್ಲಿ ಮಾಡ್ತಾಯಿದ್ದಾಳೆ. ಇನ್ನೇನಿದ್ದರೂ ರಾತ್ರಿ ಹೊತ್ತು ಮಾತ್ರ ಡೈಪರ್!!

Friday, July 24, 2009

ತಾತನ್ ಹೆಸ್ರು "ಮಾಮು"....

ಪುಟ್ಟಿ ಈಗ ಬಹಳಷ್ಟು ಹೊಸ ಹೊಸ ಮಾತುಗಳನ್ನ ಕಲ್ತಿದ್ದಾಳೆ. ಅಮ್ಮನ ಹೆಸ್ರು ಪೂಪ, ಅಪ್ಪನ ಹೆಸ್ರು "ಏಮಂತ್", ತಾತನ ಹೆಸ್ರು "ಮಾಮು"(ರಾಮು), ಅಜ್ಜಿತಾತ ಇರೋದು "ಇಂಡಾ"(ಇಂಡಿಯಾ) ಎಲ್ಲಾ ಹೇಳ್ತಾಳೆ. ಅಲ್ಲದೇ ವರ್ಲ್ಡ್ ಮ್ಯಾಪಿನಲ್ಲಿ ಇಂಡಿಯಾ, USA, ಆಸ್ಟ್ರೇಲಿಯಾ ಗುರುತಿಸ್ತಾಳೆ.



ಅವಳ ಬುಕ್ ನಲ್ಲಿರೋ ಬಹುತೇಕ ಎಲ್ಲಾ ಪ್ರಾಣಿಗಳನ್ನ ಗುರ್ತು ಹಿಡಿತಾಳೆ. ಅಲ್ಲದೇ ಅವನ್ನು ಅವರಪ್ಪನ ಸ್ಟ್ಯಾಂಪ್ಸ್ ನಲ್ಲಿ ಕೂಡ ಕಂಡುಹಿಡಿದು ತೋರಿಸ್ತಾಳೆ. ಆನಿ, ಆರ್ಚ್(horse), ಡಾಗಿ , ತೌ (cow), ಲಾಯ್(lion), ಫಿಶ್, ಶೀಪ್, ಚಿಚೆನ್ (chicken), ಬಾ (bird), ಬಟ್ (butterfly), ಮನ್ (monkey), ಡಕ್....

ಅವಳಿಗೆ ಬುಕ್ಸ್ ಅಂದ್ರೆ ತುಂಬಾ ಇಷ್ಟ. ಅವಳ ಇತರ ಎಲ್ಲಾ ಆಟದ ಸಾಮಾನುಗಳು ಈಗ ಮೂಲೆ ಸೇರಿವೆ. ಅವಳ ಬಳಿ ಇರೋ ಬುಕ್ಸ್ ಅಲ್ಲದೇ ಆಗಾಗ್ಗೆ ಲೈಬ್ರರಿಯಿಂದಲೂ ಬಹಳಷ್ಟು ಬುಕ್ಸ್ ತರ್ತೀನಿ ಪುಟ್ಟಿಗೆ. ಇಲ್ಲಿಯವರೆಗೆ ಅವಳು ಹೆಚ್ಚು ಇಷ್ಟಪಟ್ಟ ಬುಕ್ಸ್ ಇವು:
Moo, moo who are you? : a fold-out surprise book
Peek-a-baby [Board book]
Peek-a-boo! : a lift-the flap book
Baby loves peekaboo! : touch-and-feel and lift-the-flap
What does baby do? : a first lift-the-flap book [Board book]
Bob's busy saw [Board Book]
What does baby say? [Board book]
Baby animals [Board book]
My big animal book
Pooh's 123
Fruity Cutie Colors
Baby Bop's Counting Book
Barney's Color ಸರ್ಪ್ರೈಸ್

ಪ್ರತಿಯೊಂದು ಬುಕ್ಕನ್ನು ದಿನಕ್ಕೊಂದು ಐದಾರು ಸರ್ತಿ ತಿರುವು ಹಾಕುತ್ತಾ, ಅದರಲ್ಲಿರೋ ಪ್ರತಿಯೊಂದನ್ನು ಗುರುತಿಸಿ ಹೇಳೋದು ಅವಳಿಗೆ ಬಹಳ ಖುಶಿ. ಅವಳು ಹೀಗೆ ಹೇಳೋವಾಗ ಅಮ್ಮ ’ಗುಡ್ ಗರ್ಲ್’ ಹೇಳೋದು ಮರೆತ್ರೆ, ತನಗೆ ತಾನೆ "ದುದ್ದು, ಗುಗ್ಗು" ಹೇಳ್ಕೋತಾಳೆ :-) ಅವಳು ಹೀಗೆ ಬುಕ್ ಓದೊವಾಗ ನನ್ಗೆ ಅಥವಾ ಅವರಪ್ಪನಿಗೆ ಅದು, ಅದು ಅಂತ ಬೆರಳು ಮಾಡಿ ಕೇಳ್ತಾಳೆ. ಅದೇ ನಾವು ಕೇಳಿದ್ರೆ ೨-೩ ಸರಿ ಹೇಳಿ ನಂತರ ಏನೆ ಕೇಳಿದ್ರೂ "ಡಾಡಿಡುಡಾ, ಪಂಪಂ" ಅಂತೆಲ್ಲಾ ಏನೋ ಹೇಳ್ತಾಳೆ. ಅವಳಿಗೆ ಓದಲು ಬಿಡಬೇಕು, ನಾವು ಪ್ರಶ್ನೆ ಮಾಡಬಾರದು!!
ಅದೆ ನಾವು ಸರಿಯುತ್ತರ ಕೊಡದೇ "ಡಾಡಿಡುಡಾ, ಪಂಪಂ" ಅಂತೆಲ್ಲಾ ಅಂದ್ರೆ ಸಿಟ್ಟು ಮಾಡಿಕೊಂಡು "ಬಾಬಿ’(ಬ್ಯಾಡ್ ಬಾಯ್) ಅಂತಾಳೆ:(


ನಮ್ಮ್ ಪುಟ್ಟಿಗೆ ಟಿವಿ ಅಂದ್ರೆ ಅಷ್ಟಕ್ಕೆ ಅಷ್ಟೆ. ಆದ್ರೆ ಕನ್ನಡ ಅಥವಾ ಇಂಗ್ಲೀಶ್ ರೈಮ್ಸ್ ಹಾಕಿದ್ರೆ ನೋಡ್ತಾಳೆ ಅದೂ ಎಲ್ಲಾ ಹಾಡಿಗೂ ತನ್ನದೇ ಶೈಲಿಯಲ್ಲಿ ಆಕ್ಶನ್ ಮಾಡುತ್ತಾ! ಅದ್ ಬಿಟ್ಟ್ರೆ ಅನಿಮಲ್ ಪ್ಲಾನೆಟ್ ಅದ್ರಲ್ಲೂ ಆನೆ, ಪ್ರಾಣಿಗಳಿರೋ "ರಾಮಲಕ್ಷ್ಮಣ", "ಹಾಥಿ ಮೆರೆ ಸಾಥಿ" ಚಿತ್ರಗಳನ್ನ ಸ್ವಲ್ಪ ನೋಡ್ತಾಳೆ.
ರೈಮ್ಸ್ ಅವ್ಳಿಗೆ ಈಗ ನಾವು ಕಾರಿನಲ್ಲಿ ಹೋಗೋವಾಗ ಕೂಡ ಅಮ್ಮ ಹಾಡಿ ಹೇಳ್ಬೇಕು. ತನಗೆ ಯಾವ ರೈಮ್ ಬೇಕು ಅನ್ನೋದನ್ನ ಮಾತಿನಲ್ಲಿ ಅಥವಾ ಆಕ್ಷನ್ ಮಾಡಿ ತೋರಿಸ್ತಾಳೆ. ಇದ್ರಲ್ಲಿ ಅವ್ಳಿಗೆ "ಆನೆ ಬಂತು ಆನೆ", "ಅವಳ ಹೆಸ್ರು ಪದ್ದು", "ಘಂಟೆಯ ನೆಂಟನೆ", "ಚಂದಮಾಮ ಓಡಿ ಬಾ", "Baa baa black sheep", "Hickory Dickory dock", "Row row row your boat", "Twinkle Twinkle little star", "Humpty Dumpty sat on a wall", "Two little dicky birds sat on a wall" ಇವು ತುಂಬಾ ಇಷ್ಟ.

ಅಮ್ಮನಿಗೆ ಅಡಿಗೆ ಮನೆಯಲ್ಲಿ ಸಹಾಯ ಮಾಡೋದು ಅಂದ್ರೆ ಎಲ್ಲೆಲ್ಲಿದ ಖುಶಿ!! ಈರುಳ್ಳಿ ಸಿಪ್ಪೆ ಬಿಡಿಸೋದೇನು, ತಪಾತಿ(ಚಪಾತಿ) ಹಿಟ್ಟನ್ನ ನಾದೋದು, ಲಟ್ಟಿಸೊದು... ಮನೆಯಲ್ಲಿ ಸಣ್ಣದೊಂದು ಪೇಪರ್ ಚೂರು, ಕಸ ಬಿದ್ದಿದ್ರೂ "ಟಾಆ"(ಟ್ರಾಶ್/ಕಸ) ಅಂತ ಕಸದಬುಟ್ಟಿಗೆ ಹಾಕೋದು!! ಹೀಗೆ ದಿನವಿಡೀ ಏನೋ ಮಾಡುತ್ತಾ ಅಮ್ಮನಿಗೆ ಕೆಲ್ಸ ಕೊಡ್ತಾಳೆ:)