Friday, February 29, 2008

ಎರಡು ಎರಡು ಎರಡು !!!

ಆಗ್ಲೇ ನಮ್ಮ್ ಬಂಗಾರಿಗೆ ಎರಡು ತಿಂಗ್ಳು ತುಂಬ್ತು. ಅವಳ ಜೊತೆ ಇದ್ದ್ರೆ ದಿನಗಳು ಎಷ್ಟ್ ಬೇಗ ಉರುಳುತ್ತೆ ಅನ್ನೋದು ಗೊತ್ತೇ ಆಗೋಲ್ಲ. ಸರಿ, ಮತ್ತೊಂದು ಹುಟ್ಟಿದಹಬ್ಬ ಮಾಡೋ ಸಮಯ ಬಂದೇಬಿಡ್ತು. ಈ ಸರ್ತಿ ಮನೆಗೆ ಬಂದ ಸ್ನೇಹಿತರೂ ಅವಳಿಗಾಗಿ ಒಂದು ಕೇಕ್ ತಂದ್ರು, ಜೊತೆಗೆ ಎಂದಿನಂತೆ ಅವರಪ್ಪ ತಂದಿದ್ದ ಕೇಕ್ ಇತ್ತು. ಒಟ್ಟಾರೆ ಎರಡು ಕೇಕ್-ಗಳಾದವು. ಫೋಟೋ ನೋಡಿದ ಎಲ್ಲರೂ ಹಾಸ್ಯ ಮಾಡುವವರೆ, ತಿಂಗಳ ಲೆಕ್ಕದಲ್ಲಿ ಕೇಕ್ ತರೋದಾದ್ರೆ ಪುಟ್ಟಿಯ ೧೦, ೧೧ ಹುಟ್ಟುಹಬ್ಬಗಳು ಮಾಡೋವಾಗ ನಿಮಗೆ ಟೇಬಲ್ ಮೇಲೆ ಜಾಗ ಸಾಲೋಲ್ಲ ಅಂತ :D
ಅವಳು ಈಗ ಎರಡು ಅಡಿ ಉದ್ದ ಬೆಳೆದಿದ್ದಳು, ಅವರ ಅಜ್ಜ ರೇಗಿಸ್ತಾಯಿದ್ದ್ರು "೨ ತಿಂಗ್ಳಿಗೆ ೨ ಅಡಿ.. ಹೀಗೇ ಆದ್ರೆ ನೀನು ಆಕಾಶದೆತ್ತರ ಬೆಳೀತೀಯಾ ಕಂದ" ಅಂತ. ೨ ತಿಂಗಳಿಗೆ ೨ ಅಡಿ ಉದ್ದ ಬೆಳೆದು ೨ ಕೇಕ್-ಗಳೊಂದಿಗೆ ಬರ್ತ್-ಡೇ ಮಾಡಿಕೊಂಡ ಬಂಗಾರಿಗೆ ಖುಶಿಯೋ ಖುಶಿ:)

Saturday, February 16, 2008

ಹಾಡೋಣ ಬಾ ಆಡೋಣ ಬಾ

ನನ್ನ್ ಹತ್ರ ಎಷ್ಟೊಂದ್ ಗೊಂಬೆಗಳಿವೆ ನೋಡಿದ್ರಾ, ಬರ್ತೀರಾ ನನ್ನ್ ಜೊತೆ ಆಡೋಕೆ??

ಹಾಡೋಣ ಬಾ ಆಡೋಣ ಬಾ
ಒಂದಾಗಿ ನಾವೆಲ್ಲಾ ಈಗ (೨)
ಈ ಸಂಜೆಯಲ್ಲಿ ತಂಗಾಳಿಯಲ್ಲಿ
ಗೊಂಬೆಯಾಟ(ಜೂಟಾಟ) ಆಡೋಣ ಬಾ
ಹಾಡೋಣ ಬಾ ಆಡೋಣ ಬಾ
ಒಂದಾಗಿ ನಾವೆಲ್ಲಾ ಈಗ

ಗಿಣಿಯಂತೆ ನಾನು ಮಾತಾಡುವೆ
ನವಿಲಂತೆ ನಾನು ಕುಣಿದಾಡುವೆ
ಬಾನಾಡಿಯಂತೆ ನಾ ಹಾರಾಡುವೆ
ಮರಿ ದುಂಬಿಯಂತೆ ನಾ ಹಾರುವೆ
ಸಂತೋಷ ತರುವೆ ಆನಂದ ಕೊಡುವೆ
ಎಂದೆಂದೂ ಹೀಗೆ ಜೊತೆಯಾಗಿ ಇರುವೆ
ನೂರಾರು ಕಥೆ ಹೇಳುವೆ

ಹಾಡೋಣ ಬಾ ಆಡೋಣ ಬಾ

ಬಾ ಪ್ರೀತಿಯಿಂದ ಮುದ್ದಾಡುವೆ
ಹೀಗೇಕೆ ನೀನು ಕದ್ದೋಡುವೆ
ನೀನೆಲ್ಲೆ ಇರಲಿ ನಾ ಕೂಗುವೆ
ಹೊಸ ರಾಗವೊಂದ ನಾ ಹಾಡುವೆ
ಕಿವಿ ಮಾತನೊಂದ ನೀ ಕೇಳು ಈಗ
ನನಗಾಗಿ ಆಗ ಬರಬೇಕು ಬೇಗ
ನೆನಪಲ್ಲಿ ಇಡು ಇನ್ನುವೆ

ಹಾಡೋಣ ಬಾ ಆಡೋಣ ಬಾ


ಬೇಬಿ ಶ್ಯಾಮಿಲಿ ಅಭಿನಯದ ಭೈರವಿ ಚಿತ್ರದ ಈ ಹಾಡನ್ನು ನೋಡಿ ಇಲ್ಲಿ ಆನಂದಿಸಿರಿ.

Friday, February 15, 2008

ಗುಡಿಗೆ ಹೊರಟಲು ನಮ್ಮ್ ರಾಜಕುಮಾರಿ

ಮಗುವನ್ನ ಹೊರಗಡೆ ಅಲ್ಲಿ ಇಲ್ಲಿ ಕರೆದು ಕೊಂಡು ಹೋಗುವ ಮೊದಲು ದೇವಸ್ತಾನಕ್ಕೆ ಹೋಗಿ ದೇವರ ದರ್ಶನ ಮಾಡಬೇಕು ಅಂತ ಅಮ್ಮ ಹೇಳಿದ್ರು. ಇವೆಲ್ಲ ವಿಚಾರ ನನಗೂ ಈಗ ಅಷ್ಟೆ ತಿಳಿತಾಯಿರೋದು, ಪುಟ್ಟಯಿಂದಾಗಿ ಬಹಳಷ್ಟು ವಿಚಾರ ತಿಳ್ಕೊಳ್ತಾಯಿದ್ದೀನಿ. ಹೀಗೆ ಮೊದಲ ಸರ್ತಿ ದೇವಸ್ತಾನಕ್ಕೆ ಹೋಗೋದಕ್ಕೆ "ನಿಷ್ಕ್ರಮಣ" ಅಂತ ಕರೀತಾರಂತೆ.
ಮಗುವನ್ನು ಈ ಬಾಹ್ಯ ಪ್ರಪಂಚದಲ್ಲಿ ಎದುರಾಗುವ ಅಪಾಯಗಳಿಂದ ರಕ್ಷಿಸುವಂತೆ ಭಗವಂತನಲ್ಲಿ ಪ್ರಾರ್ಥಿಸುವುದೇ ಇದರ ಹಿಂದಿನ ಉದ್ದೇಶ.
ಪುಟ್ಟಿ ನಮ್ಮೂರಿಗೆ 40 ಮೈಲಿ ದೂರದಲ್ಲಿರೋ ಕ್ವಿನ್ಸಿ ಅನ್ನೋ ಊರಿನಲ್ಲಿರೋ ದೇವಸ್ತಾನಕ್ಕೆ ಮನೆಯವರ ಜೊತೆ ಹೊರಟ್ಲು. ಕಾರ್ ಸೀಟಿನಲ್ಲಿ ಕೂರೋದು ಅಂದ್ರೆ ಅವಳಿಗೆ ಅಲರ್ಜಿ. ಹಾಗಾಗಿ ಅವಳನ್ನು ರಮಿಸಲು ದಾರಿಯುದ್ದಕ್ಕೂ ಅವಳಿಗೆ "ಹರಿ ನಾಮವೇ ಚಂದ ಅದ ನಂಬಿಕೊ ಕಂದ" ಮತ್ತಿತರ ಹಾಡು ಹೇಳುತ್ತಾ ಕರೆದುಕೊಂಡು ಹೋಗಿದ್ದಾಯ್ತು. ಅಲ್ಲಿಂದ ಬಂದಮೇಲೆ ಶುರುವಾಯಿತು ಅವಳ ಸುತ್ತಾಟ:)

Wednesday, January 30, 2008

ಪುಟ್ಟಿಗೆ ಒಂದು ತಿಂಗಳು ತುಂಬಿತು


ಪುಟ್ಟಿಗೆ ಮೊದಲ ವರ್ಷ ಪ್ರತಿ ತಿಂಗಳೂ ಹುಟ್ಟಿದಹಬ್ಬ ಆಚರಿಸಬೇಕು ಅಂತ ಅವರ ಅಪ್ಪನ ಆಸೆ. ಆದರೆ ಮಕ್ಕಳಿಗೆ ೩ ವರ್ಷ ತುಂಬುವವರೆಗೆ ಬರ್ತ್ ಡೆ ಪಾರ್ಟಿ ಮಾಡೋದೆಲ್ಲ ನಮ್ಮ್ ಖುಶಿಗೆ ಅಷ್ಟೆ, ಆ ಕಂದಮ್ಮಗೆ ಏನೂ ಗೊತ್ತಾಗೊಲ್ಲ, ಕೆಲವೊಮ್ಮೆ ಆ ಜನಗಳ ಮಧ್ಯೆ ಹಿಂಸೆಯೂ ಆಗುತ್ತೆ ಬೇಡ ಸುಮ್ನಿರಿ ಅಂತ ನಾನ್ ಅಂದ್ರೆ. "ನಮ್ಮ್ ಪುಟ್ಟಿಗೆ ಎಲ್ಲರ ಪರಿಚಯ ಆಗ್ಬೇಕು ಅಲ್ವ, ಊಟಕ್ಕೆ ಬನ್ನಿ ಅಂತ ಕರಿದಿದ್ದ್ರೆ ಇಲ್ಲಿ ಯಾರೂ ಮನೆಗೆ ಬರೋಲ್ಲ, ಇದು ಒಂದು ನೆಪ ಅಷ್ಟೆ ಸ್ನೇಹಿತರನ್ನ ಕರಿಯೋಕೆ" ಅಂದ್ರು. ಅವರ ಮಾತು ಸರಿ ಎನ್ನಿಸಿ ಮಗಳಿಗೆ ಪ್ರತಿ ತಿಂಗಳು ತುಂಬಿದಾಗ ೨-೩ ಗೆಳೆಯರನ್ನ ಮನೆಗೆ ಕರೆಯೋದು ರೂಢಿಯಾಯಿತು. ಅಂತೂ ಪುಟ್ಟಿ ಹೆಸರಲ್ಲಿ ಪ್ರತಿ ತಿಂಗಳು ನಾವ್ ಕೇಕ್ ತಿನ್ನೋದು ಶುರುವಾಯಿತು.


ಹುಟ್ಟಿದ ಹಬ್ಬ ಬಂದಾಯ್ತು
ಗೆಳೆಯರೆಲ್ಲ ಸೇರಾಯ್ತು
ಕೇಕನ್ನು ತಿಂದಾಯ್ತು !!

Thursday, January 10, 2008

ನಾಮಕರಣ ಮತ್ತು ತೊಟ್ಟಿಲ ಪೂಜೆ


ಹನ್ನೊಂದನೆ ದಿನ ಪುಣ್ಯಾಹ ಮಾಡಿಸಿಕೊಂಡು ಮಗುವನ್ನು ತೊಟ್ಟಿಲಿನಲ್ಲಿ ಮಲಗಿಸುವ ರೂಡಿ ನಮ್ಮಲ್ಲಿದೆ. ಅದರ ಜೊತೆಯಲ್ಲೇ ನಾಮಕರಣವನ್ನೂ ಮಾಡಿಬಿಡಿ ಎಂದು ನಮ್ಮತ್ತೆಯವರು ಹೇಳಿದರು. ನಮ್ಮ ಬಂಗಾರಿಗೆ ವ್ಯವಹಾರ ನಾಮವಾಗಿ "ಸಾಹಿತ್ಯ" ಹೆಸರು ಆಗಲೇ ಅಸ್ಪತ್ರೆಯಲ್ಲಿನ ಎಲ್ಲಾ ದಾಖಲೆಗಳಲ್ಲಿ ಸೇರಿತ್ತು. ಹಸ್ತಾ ನಕ್ಷತ್ರದಲ್ಲಿ ಜನಿಸಿದ ಅವಳಿಗೆ ’ಪು’ ಅಕ್ಷರದಿಂದ ಶುರುವಾಗುವ ಹೆಸರು ಇಡಬೇಕಿದ್ದರಿಂದ ’ಪುಟ್ಟಿ’ ಅಂತ ಇಟ್ಟರೆ ಅದು ನಕ್ಷತ್ರನಾಮವೂ ಆಗುತ್ತೆ ಜೊತೆಗೆ ಅವಳಿಗೆ ಮುದ್ದುಹೆಸರಾಗಿಯೂ(nickname) ಇರುತ್ತೆ ಅಂತ "ಪುಟ್ಟಿ" ಹೆಸರನ್ನೆ ಇಟ್ಟೆವು.

ಹೆಸರನ್ನು ಅಕ್ಕಿಯ ಮೇಲೆ ಬರೆದು, ಅವಳ ಕಿವಿಯಲ್ಲಿ ಮೂರು ಬಾರಿ ಹೇಳಿ ನಂತರ ತೊಟ್ಟಿಲಿಗೆ ಪೂಜೆಮಾಡಿದೆವು. ಮೊದಲಿಗೆ ಒಂದು ಗುಂಡುಕಲ್ಲನ್ನು ಮಲಗಿಸಬೇಕು ಅಂದ್ರು ಅಮ್ಮ, ಇಲ್ಲೆಲ್ಲಿ ಗುಂಡುಕಲ್ಲು ಹುಡುಕೋದು ಅಂತ ಅದರ ಬದಲಿಗೆ ಸೌತೆಕಾಯನ್ನ ಮಲಗಿಸಿದ್ವಿ. ನಂತರ ಗೆಳೆತಿಯ ಮಗುವನ್ನು ಮಲಗಿಸಿದ ಶಾಸ್ತ್ರಮಾಡಿ ಕೊನೆಯಲ್ಲಿ ನಮ್ಮ್ ಪುಟ್ಟಿಯನ್ನ ತೊಟ್ಟಿಲಿಗೆ ಹಾಕಿ ಲಾಲಿ ಹಾಡಿದೆವು.
ಅಮ್ಮ ಹೇಳಿದ ಲಾಲಿ ಹಾಡು ಇದು :
ರಾಗ :ಮಧ್ಯಮಾವತಿ

ಜೋ ಜೋ ಜೋ ಜೋ ಮಂಗಳ ಮಂಜುಳವಾಣೀ
ಜೋ ಜೋ ಜೋ ಜೋ ಶ್ರೀಕರ ಶುಭಕರ ರಾಣಿ //ಪ//

ಪತಿತ ಪಾವನೆ ಪರಮೇಶ್ವರಿಯೇ
ಪಾಲಿಸು ನಮ್ಮನು ಶ್ರೀಶಂಕರಿಯೇ
ಪಂಕಜನೇತ್ರೆ ಪರಮ ಪವಿತ್ರೇ
ಪರಶಿವಸತಿ ನಿನ್ನ ಪಾಡಿ ತೂಗುವೆನಮ್ಮ //ಜೋ ಜೋ//

ಭಕ್ತಿಗೆ ಒಲಿದು ಮುಕ್ತಿಯ ನೀಡುವೆ
ಭಗವತಿ ತಾಯೇ ಆನಂದಮಾಯೇ
ಬಾಲಹನುಮನ ತಾಯೇ ಜಗನ್ಮಾಯೆ
ಭಕ್ತಿಯಿಂ ಜೋಗುಳ ಪಾಡಿ ತೂಗುವೆನಮ್ಮ //ಜೋ ಜೋ//

Thursday, January 03, 2008

ಮುದ್ದುಮರಿ ಮನೆಗೆ ಬಂದಳು


ಆಸ್ಪತ್ರೆ ವಾಸ ಸಾಕು ನಡಿರಿ ನಮ್ಮ್ ಮನೆಗೆ ಹೋಗೋಣ ಅಂತ, ತನ್ನ ಚಿಕ್ಕ ಸೋದರ ಮಾವ ಆಸ್ಟ್ರೆಲಿಯಾದಿಂದ ಕಳುಹಿಸಿದ್ದ ಗುಲಾಬಿ ಸ್ಕರ್ಟ್, ಮೇಲಂಗಿ, ಕಾಲ್ಚೀಲ, ಟೊಪ್ಪಿ, ಮೇಲೆ ಕೆಂಪು ಜಾಕೆಟ್ ಧರಿಸಿ ರೆಡಿ ಆಗೇಬಿಟ್ಟ್ಲು.

ಸರಿ, ಆಸ್ಪತ್ರೆ ಸಿಬ್ಬಂದಿಗೆಲ್ಲ ಸಿಹಿ ಹಂಚಿ, ಅಪ್ಪನ ಕಾರಿನಲ್ಲಿ ತನ್ನದೇ ಕಾರ್ ಸೀಟಿನಲ್ಲಿ ಕೂತು ಮನೆಗೆ ಬಂದ್ಲು. ಅಜ್ಜಿ ಆರತಿ ರೆಡಿ ಮಾಡಿಟ್ಟು ಕಾಯ್ತಾಯಿದ್ರು. ಹಾಡು ಹೇಳಿ ಮೊಮ್ಮಗಳನ್ನು ಮನೆಗೆ ಬರಮಾಡಿಕೊಂಡರು.

ಅಜ್ಜಿ ಅವಳಿಗಾಗಿ ಹಾಡಿದ ಹಾಡು ಇದು:

ರಾಗ: ಮಧ್ಯಮಾವತಿ
ಎತ್ತಿರೇ ನವರತ್ನದಾರತಿ ಪಾರ್ವತಿ ದೇವಿಗೆ
ಶ್ರದ್ದೆಯಿಂದಲಿ ಭಕ್ತಿಯಿಂದಲಿ ಬೆಳಗಿರೆಲ್ಲ ಆರತಿ //ಪ//

ದೇವಿ ಶಾರದೆ ಗೌರಿ ಲಕ್ಷ್ಮಿಗೆ ಲಲಿತ ದುರ್ಗಾ ಮಾತೆಗೆ
ಸರ್ವ ಪಾಪಾಹಾರಿಣಿ ಶ್ರೀ ಪಾರ್ವತೀದೇವಿಗೆ //ಎತ್ತಿರೇ//

ಹರಿಯ ಸೋದರಿ ಹರನ ವಲ್ಲಭೆ ಗಣಪನಾ ಮಾತೆ ಗೌರಿಗೆ
ಸರ್ವ ದುಃಖತಾಪ ಹಾರಿಣಿ ಪಾರ್ವತಿದೇವಿಗೆ//ಎತ್ತಿರೇ//

Monday, December 31, 2007

ಆಕಾಶದಿಂದ ಧರೆಗಿಳಿದ ಗೊಂಬೆ

ಆಕಾಶದಿಂದ ಧರೆಗಿಳಿದ ಗೊಂಬೆ 
ಇವಳೆ ಇವಳೆ ನಮ್ಮ್ ಮನೆಯ ಗೊಂಬೆ 
ಚೆಲುವಾದ ಗೊಂಬೆ ಚಂದನದ ಗೊಂಬೆ !! 
ಡಿಸೆಂಬರ್ ತಿಂಗಳ ಕೊರೆವ ಚಳಿಯನ್ನು ಬೆಚ್ಚಗೆ ಮಾಡಲು ನಮ್ಮ ಮನೆಗೆ ಬಂದಳು ಈ ಪುಟ್ಟು ಮರಿ. ಅಪ್ಪ ಕ್ಯಾಮೆರಾ ಹಿಡಿದು “ಸಾಹಿತ್ಯಾ, ಕಣ್ಣ್ ಬಿಡಮ್ಮ ಅಪ್ಪನ್ನ ನೋಡಮ್ಮ” ಅಂದಿದ್ದೆ ತಡ.. ಜಾಣೆಯಂತೆ ತನ್ನ ಪಿಳಿ ಪಿಳಿ ಬಟ್ಟಲು ಕಣ್ಣು ಬಿಟ್ಟು ಎಲ್ಲರ ನೋಡಿದಳು. ಆಸ್ಪತ್ರೆಯಲ್ಲಿ ತೆಗೆದ ಮೊದಲ ಕೆಲುವು ಫೋಟೋಗಳು ಇವು.