Wednesday, July 21, 2010

ಹ್ಯಾಪಿ ಬರ್ತ್ ಡೇ ರತ್ನ ಅಜ್ಜಿ!!!

ಇವತ್ತು ನನ್ನ ಅಮ್ಮ ಅಂದ್ರೆ ಪುಟ್ಟಿಯ ಅಜ್ಜಿಯ ಹುಟ್ಟುಹಬ್ಬ. ಅಜ್ಜಿಗೆ ಪುಟ್ಟಿ ಹ್ಯಾಪಿ ಬರ್ತ್ ಡೇ ಹೇಳಿದ್ದು ಹೀಗೆ....


ಬರ್ತ್ ಡೇ ಅಂದ ಕೂಡಲೆ ತಲೆಗೆ ಪಾರ್ಟಿ ಟೋಪಿ ಹಾಕಿಕೊಳ್ತಾಳೆ:)


Tuesday, July 13, 2010

ಬರೆಯೋ ಹಾದಿಯಲ್ಲಿ ಪುಟ್ಟಿಯ ಮೊದಲ ಕೆಲವು ಹೆಜ್ಜೆ!

ಪುಟ್ಟಿ ABC ಹಾಡು ಹೇಳೋಕೆ ಶುರು ಮಾಡಿ ಬಹಳ ದಿನಗಳೇ ಆಗಿದೆ. ಆದ್ರೆ ಎಲ್ಲಾ ಅಕ್ಷರಗಳನ್ನ ಗುರುತಿಸೋದು ಬರುತ್ತಿರಲಿಲ್ಲ, ಆದ್ರೆ ಆಗ್ಲೇ A,B,D ಬರಿಯೋಕೆ ಶುರು ಮಾಡಿದ್ಲು. ವಾರಕ್ಕೊಂದು ಅಕ್ಷರ ಹೇಳಿ ಕೊಡಿ, ಜೊತೆಗೆ ಆ ವಾರವಿಡೀ ಒಂದೇ ಅಕ್ಷರದ ಕಲರಿಂಗ್ ಮಾಡಿಸಿ ಅನ್ನೋ ಸಲಹೆ ಗೆಳತಿ ಶುಭಾ (ಶಕ್ತಿ ಅಮ್ಮ) ಕೊಟ್ಟ್ರು.
ಅಂತರ್ಜಾಲದಲ್ಲಿ ಅಕ್ಷರಗಳ ಕಲರಿಂಗ್ ಪೇಜ್ಸ್ ಹುಡುಕುತ್ತಾ “Letter of the week” ಅನ್ನೋ ಈ ತಾಣದ ಪರಿಚಯವಾಯ್ತು. ಅಲ್ಲಿನ ಆಟ ಜೊತೆಗೆ ಪಾಠ ತುಂಬಾ ಇಷ್ಟವಾಯ್ತು. ಅದರಲ್ಲಿದ್ದ ಹಾಗೆ ಎಲ್ಲಾ ಅಲ್ಲದಿದ್ದರೂ ಅಲ್ಪ ಸ್ವಲ್ಪ ಮಾಡಲು ಶುರು ಮಾಡಿದೆ. ಜೊತೆಗೆ starfall.com ನಲ್ಲಿರುವ ಅಕ್ಷರ ನೋಡ್ತಾ ಹೋದ್ವಿ, ಆದ್ರೆ ಪುಟ್ಟಿ ಬರಿ A ನೋಡಿ ಸುಮ್ಮನಾಗುತ್ತಿರಲಿಲ್ಲ ದಿನಕ್ಕೆ ನಾಲ್ಕೈದು ಅಕ್ಷರ ನೋಡುತ್ತಿದ್ದಳು. ಅವಳು ಪೈಂಟ್ ಮಾಡಿದ/ ತಿದ್ದಿದ ಕೆಲವು A ಗಳು.

ಹೀಗೆ ಒಂದು ವಾರವಿಡೀ A ಜಪ ನೋಡಿ, ಕೇಳಿ ಪುಟ್ಟಿಗೆ ಬೋರ್ ಆಯ್ತೋ ಏನೋ. ಎರಡನೆ ವಾರ ಅವಳಾಗಿಯೇ ತನ್ನ alphabet floor mat ನಲ್ಲಿರೋ ಅಕ್ಷರಗಳನ್ನು ಗುರುತಿಸುತ್ತಾ ಹೋದ್ಲು, ಅಲ್ಲದೆ ಎಲ್ಲದರ phonic sound ಕೂಡ ಹೇಳೋಕೆ ಶುರು ಮಾಡಿದ್ಲು. ಈಗವಳು Capital ಮತ್ತು Lowercase letters ಎರಡನ್ನೂ ಗುರುತಿಸಿತ್ತಾಳೆ. ಆದ್ರೆ b, d, p ಮತ್ತು q ಇವುಗಳು ಕೆಲವೊಮ್ಮೆ ತಪ್ಪಾಗುತ್ತವೆ. ಅಲ್ಲಿಗೆ ನಮ್ಮ ವಾರಕ್ಕೊಂದು ಅಕ್ಷರ ಕಾರ್ಯಕ್ರಮ ಮುಗಿದೇ ಹೋಯ್ತು. ಜೊತೆಗೆ ಅಜ್ಜಿ ತಾತ ಇಲ್ಲಿದ್ದರಿಂದ ಪುಟ್ಟಿ ಅವರೊಡನೆ ಅಲ್ಲಿ ಇಲ್ಲಿ ಊರು ಸುತ್ತುವುದು ಹೆಚ್ಚಾಯ್ತು. ಆದ್ರೆ ಎಲ್ಲಿ ಹೋದ್ರು ಅಲ್ಲಿ ಅಕ್ಷರಗಳನ್ನ ಗುರುತಿಸೋದು ಹೊಸ ಆಟವಾಯ್ತು. ಅಂಗಡಿಯಲ್ಲೂ ಅದೇ ಆಟ, ತನ್ನ ಪುಸ್ತಕಗಳಲ್ಲೂ ಅದೇ ಹುಡುಕಾಟ. ಇವುಗಳೆಲ್ಲದರ ಜೊತೆಗೆ ಬರಿಯೊದು ಕೂಡ ಜಾಸ್ತಿ ಆಯ್ತು. ದಿನೆ ದಿನೆ ಅವಳ ಬರವಣಿಗೆ ಹೆಚ್ಚುತ್ತಿದೆ. ತನ್ನ ನೆಚ್ಚಿನ chalkboard ಮೇಲೆ ಅಕ್ಷರಗಳನ್ನ ಬರಿಯುತ್ತಿರುವ ಪುಟ್ಟಿ.

Saturday, June 05, 2010

ಅಮ್ಮ ರಾಗ :)


ಪುಟ್ಟಿ ದಿನಾ ಬೆಳಗ್ಗೆ ಎದ್ದಾಗ “ಅಮ್ಮ ಅಮ್ಮ” ಅಂತ ಕೂಗಿ ಕರೆಯೋದು ರೂಢಿ. ಅಪ್ಪ ಹೋದ್ರೆ ಕೆಲವೊಮ್ಮೆ ಬರೊಲ್ಲ ಅವ್ಳು, ನಾನೇ ಬೇಕು. ಅಡುಗೆ ಮನೆಯಲ್ಲಿ ತಿಂಡಿ ಕೆಲಸದ್ದಲ್ಲಿದ್ದಾಗ ಕೆಲವೊಮ್ಮೆ ಹೋಗೋದು ಲೇಟ್ ಆಗುತ್ತೆ. ಇವತ್ತೂ ಹಾಗೆ ಆಯ್ತು ನಾನು ಹೋಗೋಷ್ಟ್ರಲ್ಲಿ “ಅಮ್ಮ, ಅಮ್ಮಾ, ಆಆಮ್ಮ, ಆಮ್ಮ್ಮಾಆಆ.....” ಇತ್ಯಾದಿ ಕೂಗ್ತಾಯಿದ್ಲು. ಅದೇನೇ ಅದು ನಿಂದು ಪುಟ್ಟಿ ರಾಗ ಅಂದೆ “ಅದು ಅಮ್ಮ ರಾಗ” ಅಂತ ಕಿಸಕ್ಕನೆ ನಕ್ಕಳುJ

Monday, May 17, 2010

ಕುದುರೆ ಸವಾರಿ !


ಚಡ್ಡಿ ಗಿಡ್ಡಿ ಹಾಕಿಕೊಂಡು
ಕುದುರೆ ಮೇಲೆ ಕುಳಿತುಕೊಂಡು
ಲಗಾಮು ಹಿಡಿದುಕೊಂಡು
ಹೈ! ಹೈ! ಹೈ!

ಲಂಗ ಗಿಂಗ ಹಾಕಿಕೊಂಡು
ಕುದುರೆ ಮೇಲೆ ಕುಳಿತುಕೊಂಡು
ಅಣ್ಣನ ಸೊಂಟ ಹಿಡಿದುಕೊಂಡು
ಹೈ! ಹೈ! ಹೈ!

ಕಂದು ಬಣ್ಣ ನಮ್ಮ ಕುದುರೆ
ಗಾಳಿ ಹಾಗೆ ಓಡೊ ಕುದುರೆ
ನಮ್ಮ ಕುದುರೆ! ನಮ್ಮ ಕುದುರೆ!
ಹೈ! ಹೈ! ಹೈ!

ಕುದುರೆ ಮೇಲೆ ಕುಳಿತುಕೊಂಡು
ಅದರ ಬೆನ್ನ ತಟಕೊಂಡು
ಅಲ್ಲಿ ಇಲ್ಲಿ ಸುತ್ತಿಕೊಂಡು
ಹೈ! ಹೈ! ಹೈ!

ಕುದುರೆ ಮೇಲೆ ಕುಳಿತುಕೊಂಡು
ಹಳ್ಳ ಗಿಳ್ಳ ಹಾರಿಕೊಂಡು
ಮನೆಗೆ ಬಂದು ಸೇರಿಕೊಂಡು
ಹೈ! ಹೈ! ಹೈ!

ಕುದುರೆ ಮೈಯ ಸವರಿ ತಟ್ಟಿ
ಹುರುಳಿ ಗಿರಳಿ ತಂದು ಕೊಟ್ಟು
ಸಾಕುವೆವು ನಮ್ಮ ತಟ್ಟು
ಹೈ! ಹೈ! ಹೈ!

--ಜೆ. ಪಿ. ರಾಜರತ್ನಂ ಅವರ ’ಕಡ್ಲೆಪುರಿ’ ಸಂಕಲನದಿಂದ.



Thursday, May 06, 2010

ಯಾರು ನಗಿಸಿದರೋ ನಿನ್ನ ಕಂದ ....


ಯಾರು ನಗಿಸಿದರೋ
ನಿನ್ನ ಕಂದ ..
ನಿನ್ನ ನಗುವೆ ನಮಗೆಲ್ಲ
ಆನಂದ ಆನಂದ...

ಪೀಲಾಂಗೋವಿ ಕಳ್ಳ ಕೃಷ್ಣ
ನಿನ್ನ ನಗಿಸಿದನ?
ತನ್ನ ನವಿಲುಗರಿಯಿಂದ
ತನ್ನ ಮುರಳಿ ರಾಗದಿಂದ
ನಿನ್ನ ನಗಿಸಿದನಾ ಕಂದ ಕಂದ....?

ಏಕದಂತ ಗಣಪಾ
ನಿನ್ನ ನಗಿಸಿದನ?
ತನ್ನ ಸೊಂಡಲಿಂದ
ತನ್ನ ಡುಮ್ಮು ಹೊಟ್ಟೆಯಿಂದ
ನಿನ್ನ ನಗಿಸಿದನಾ ಕಂದ ಕಂದ...?

ಕಪಿಯರಾಜ ಹನುಮ
ನಿನ್ನ ನಗಿಸಿದನ?
ತನ್ನ ಬಲದಿಂದ
ತನ್ನ ಕಪೀಚೆಸ್ಟೆಯಿಂದ
ನಿನ್ನ ನಗಿಸಿದನಾ ಕಂದ ಕಂದ... ?


ಈ ಪದ್ಯ ಇಲ್ಲಿಂದ ಎರವಲು ಪಡೆದದ್ದು...

Thursday, April 29, 2010

ಕಾಮನ ಬಿಲ್ಲು

ಪುಟ್ಟಿಗೆ ಬಣ್ಣಗಳೊಂದಿಗೆ ಆಟವಾಡೋದು ಬಲು ಇಷ್ಟ. ಯಾವಾಗ ಕೇಳಿದ್ರೂ ’ಪೈಂಟಿಂಗ್/ ಕಲರಿಂಗ್ ಮಾಡೋಣ’ ಅಂತಾಳೆ. ಅದ್ರಲ್ಲೂ ಅವಳ ನೆಚ್ಚಿನದು ’ರೈನ್-ಬೋ’ :)) ಅವಳು ಮಾಡಿರೋ ಹತ್ತಾರು ಚಿತ್ರಗಳಲ್ಲಿ ಕೆಲವು ಇಲ್ಲಿವೆ.









ಅವಳು ತಿನ್ನುವ ’Fruitloops' ನಿಂದ ಕಾಮನಬಿಲ್ಲು ಮಾಡಿರೋದು:) ಜೊತೆಗೆ ಅವಳ ನೆಚ್ಚಿನ ಹಾಡು.

ಕಾಮನ ಬಿಲ್ಲು ಕಮಾನು ಕಟ್ಟಿದೆಮೋಡದ ನಾಡಿನ ಬಾಗಿಲಿಗೆ
ಬಣ್ಣಗಳೇಳನು ತೋರಣ ಮಾಡಿದೆಕ೦ದನ ಕಣ್ಣಿಗೆ ಚಂದವ ಮಾಡಿದೆ
ಹಣ್ಣಿನ ಹೂವಿನ ಹೊನ್ನನು ಕೂಡಿದೆಮಕ್ಕಳಿಗೊಕುಳಿಯಾಟವನಾಡಿದೆ
ತೆಂಗಿನ ತೋಟದ ಬುಡದಲಿ ಮೂಡಿದೆಭೂಮಿಗೆ ಬಾನಿಗೆ ಸೇತುವೆ ಹೂಡಿದೆ
ಕಾಮನ ಬಿಲ್ಲು ಕಮಾನು ಕಟ್ಟಿದೆಮೋಡದ ನಾಡಿನ ಬಾಗಿಲಿಗೆ
(ಕವಿ : ಕುವೆಂಪು)

Sunday, April 25, 2010

ಕೋಲಿದು ನನ್ನಯ ಕುದುರೆ !!

ಮೊನ್ನೆ ಪುಟ್ಟಿಯ ಅಪ್ಪನ ಫೋನ್ ನಲ್ಲಿದ್ದ ಫೋಟೋಗಳನ್ನ ಖಾಲಿ ಮಾಡ್ತಾಯಿರುವಾಗ ಡಿಸೆಂಬರ್ 2009ರಲ್ಲಿ ತೆಗೆದಿದ್ದ ಈ ಫೋಟೋ ನೋಡಿದ ತಕ್ಷಣ ’ಅಜ್ಜನ ಕೋಲಿದು ನನ್ನಯ ಕುದುರೆ’ ನೆನಪಾಯ್ತು:)
ಅಜ್ಜನ ಕೋಲಿದು ನನ್ನಯ ಕುದುರೆ

ಹೆಜ್ಜೆಗೆ ಹೆಜ್ಜೆಗೆ ಕುಣಿಯುವ ಕುದುರೆ
ಕಾಲಿಲ್ಲದೆಯೇ ನಡೆಯುವ ಕುದುರೆ
ಕೂಳಿಲ್ಲದೆಯೇ ಬದುಕುವ ಕುದುರೆ
ನಾಲನು ಬಡಿಸದ ಜೂಲವ ಹೊದಿಸದ
ಲಾಲನೆ ಪಾಲನೆ ಬಯಸದ ಕುದುರೆ

ಅಜ್ಜನ ಕೋಲಿದು ನನ್ನಯ ಕುದುರೆ


ಚಂದಪ್ಪನಿಗೆ
ಚಿಗರೆಯೇ ಕುದುರೆ
ಮಾದೇವನಿಗೆ ನಂದಿಯೇ ಕುದುರೆ
ರಾಮಚಂದ್ರನಿಗೆ ಹನುಮನೆ ಕುದುರೆ
ಹೊಟ್ಟೆಯ ಗಣಪಗೆ ಇಲಿಯೇ ಕುದುರೆ

ಅಜ್ಜನ ಕೋಲಿದು ನನ್ನಯ ಕುದುರೆ


ನಿಂತರೆ ನಿಲ್ಲುವ ಒಳ್ಳೆಯ ಕುದುರೆ
ಓಡಿದರೋಡುವ ನನ್ನಿಯ ಕುದುರೆ
ಕಾಡದ ಬೇಡದ ಕರುಳಿನ ಕುದುರೆ
ನೋಡಲು ಬಿಡದಿಹ ಬೆತ್ತದ ಕುದುರೆ

ಅಜ್ಜನ ಕೋಲಿದು ನನ್ನಯ ಕುದುರೆ

ಅರಬರ ದೇಶದಿ ದೊರೆಯದ ಕುದುರೆ
ಕಾಠೇವಾಡದಿ ಕಾಣದ ಕುದುರೆ
ಅರಸು ಮಕ್ಕಳಿಗೆ ಸಿಕ್ಕದ ಕುದುರೆ
ನನಗೇ ಸಿಕ್ಕಿದೆ ನನ್ನೀ ಕುದುರೆ

ಅಜ್ಜನ ಕೋಲಿದು ನನ್ನಯ ಕುದುರೆ


--ಕವಿ ಸಿದ್ದಯ್ಯ ಪುರಾಣಿಕ್

’ಅವಧಿ’ ಯಲ್ಲಿ ಕಲಾವಿದ ಪ ಸ ಕುಮಾರ್ ಅವರು ಈ ಹಾಡಿಗೆ ತಕ್ಕದಾದ ಸುಂದರ ಚಿತ್ರ ಬಿಡಿಸಿದ್ದಾರೆ!